यस्तो छ ‘सानो संसार’को पहिलो झलक, शिर्ष गीत रेकर्ड
निर्माता अर्जुन कुमारको नयाँ फिल्म ‘सानो संसार’ को पहिलो झलक सार्वजनिक भएको छ । पोस्टरमा कलाकार सीतादेवी तिमिल्सिना सहित फिल्मका चार जना मुख्य कलाकारलाई प्रस्तुत गरिएको छ । पोस्टरमा उनीहरुलाई आफूभन्दा माथि रहेको कुनै वस्तुमा हेरेर मुस्कुराइरहेको देखाइएको छ ।
यो फिल्मबाट माग्ने बुढाको नामले चर्चित अभिनेता केदार घिमिरेकी पत्नी सीतादेवीले फिल्म अभिनयमा डेब्यु गर्दैछिन् । अर्जुन कुमार फिल्म्सको प्रस्तुतिमा छायांकनको क्रममा रहेको फिल्ममा तिमिल्सिना सहित राज पंगेनी शर्मा, अनु दाहाल, अन्जसा रिजाल तथा शिशिर सिवाकोटी मुख्य भूमिकामा छन् । सिद्धार्थ पुडासैनी निर्देशक हुन् ।
‘केही नयाँ कलाकार, नयाँ निर्देशक अनि नयाँ कथामा बनिरहेको चलचित्र सानो संसारको सुटिङ कार्य जारी । पहिलो पोस्टर सार्वजनिक गरेका छौँ है, फिल्म रिलिज आगामी घटस्थापना ।’ निर्माता कुमारले पोस्टर सेयर गर्दै आफ्नो फेसबुकमा लेखेका छन् । यस्तै गायिका समिक्षा अधिकारीको स्वरमा फिल्मको शिर्ष गीत रेकर्ड गरिएको छ ।
