‘छक्का पञ्जा ५’ मा नेपाल र अष्ट्रेलियामा एकसाथ रिलिज हुने
प्रतिक्षित फिल्म ‘छक्का पञ्जा ५’ दशैंको फूलपातीमा नेपालसँगै अस्ट्रेलियामा पनि एकसाथ प्रदर्शन हुने भएको छ । अस्ट्रेलियाका विभिन्न सहरमा रहेका ५० भन्दा बढी सिनेमा हलमा यो फिल्म प्रदर्शन हुने अस्ट्रेलियाका प्रदर्शक शीतल गिरीले जानकारी दिएका छन् ।
अस्ट्रेलियामा ‘छक्कापञ्जा’का अघिल्ला सिरिज हल भाडामा लिएर प्रदर्शन गरिंदै आएको भए पनि यसपटक नियमित रिलिज हुने उनको भनाई छ । हामीले यसअघि पनि चलचित्र फर्की फर्कीको पनि बक्स अफिस रिलिज गरेका थियौं । त्यहाँ नेपालीहरूको सहजता र सुझावलाई ध्यानमा राखेर छक्का पञ्जा-५ को पनि बक्स अफिस रिलिज गर्न लागिएको उनले बताएका छन् ।
यो फिल्मको अस्ट्रेलिया प्रदर्शन अधिकार रगडेल ब्वाइज, नमस्ते इन्टरटेनमेन्ट र ग्रिस इन्टरटेनमेन्टले संयुक्त रूपमा खरिद गरेका हुन् । आमा सरस्वती मुभिजको ब्यानरमा निर्माण भएको ‘छक्का पञ्जा ५’ मा दीपकराज गिरी, वर्षा सिवाकोटी, केदार घिमिरे ‘माग्ने बूढा’, बुद्धि तामाङ लगायतको मुख्य भूमिका छ । फिल्ममा समावेश दुई गीतहरु यतिबेला चर्चामा छन् ।
