आर्यन,पल र परीक्षा हङकङमा, ‘पुजार सार्की’मा उल्लेख्य दर्शक
फिल्म ‘पुजार सार्की’ हेर्न हङकङमा उलेख्य दर्शक उपस्थित भएका छन् । आइतबारको शोमा सहभागी हुन अभिनेताहरू आर्यन सिग्देल, पल शाह, अभिनेत्री परीक्षा लिम्बु सहित त्यहाँ पुगेका थिए । शोमै सहभागी भएका लेखक विकास सुवेदीले व्यापारमा नयाँ रेकर्ड राखेको बताएका छन् ।
उनले भने, “हङकङमा ‘पुजार सार्की’ले व्यापारमा नयाँ रेकर्ड कायम गरेको छ। यसअघि यहाँ प्रायः सामुदायिक हलहरूमा प्रोजेक्टरको प्रयोग गरी चलचित्र प्रदर्शन हुँदै आइरहेका रहेछन्, हाम्रो चलचित्र भने अत्याधुनिक आइम्याक्स सिनेमा हलमा नै चल्यो। त्यो एउटा रेकर्ड भयो, अर्को रेकर्ड चाहिँ व्यापारिक हो ।”सुवेदीले व्यापारिक हिसाबमा पनि ‘पुजार सार्की’ले रेकर्ड कायम गरेको जनाए । “यसअघि हङकङमा ‘जारी’ फिल्मले दर्शक उरालेको रहेछ, यस पटक ‘पुजार सार्की’मा व्यापक दर्शक आए ।
‘जारी’को रेकर्ड पनि यो फिलमले तोडेको छ । राम्रो नेपाली फिल्म रहेको खण्डमा संसारको जुनसुकै कुनामा भएता पनि दर्शकले स्वीकार गर्ने रहेछन् भन्ने अनुभूति भयो,” सुवेदीले भने, “यहाँ दुई वटा हलमा चलचित्र प्रदर्शन भएकोमा दुई वटै हाउसफुल भएपछि झन्डै दुई सय दर्शकले टिकट नपाएर फर्किन बाध्य भए । हामीले चाहेर पनि देखाउन सक्ने स्थिति रहेन ।” उनले फेरी अर्को शो को आयोजना गरेर बाँकी दर्शकलाई देखाउने बताए । उनले नेपाली समुदाय बस नै रिजर्भ गरेर फिल्म हेर्न आएको बताए ।
व्हाम्पोआ सिनेमा हलको दुई स्क्रिनमा ७ सय भन्दा धेरै दर्शकले फिल्म हेरेका थिए । फिल्मका कलाकारहरूसँग बसेर फिल्म हेर्न पाउँदा दर्शक दङ्ग देखिए । हङकङको लागि बिरेन थापा ’बिरे’ले यो फिल्म प्रदर्शन अधिकार लिएका छन् ।
नेपालमा छैटौँ हप्तामा प्रदर्शनरत फिल्म ‘पुजार सार्की’ गत जेठ १० गते प्रदर्शनमा आएको थियो । देश र विदेशमा सफल फिल्ममा आर्यन सिग्देल, प्रदीप खड्का, पल शाह, अञ्जना बराइली, परीक्षा लिम्बु लगायतको प्रमुख भूमिका रहेको छ ।
