‘छड्के सलाम’को उत्कृष्ट कभर भिडियो फिल्ममा राखिने
फिल्म ’बेहुली फ्रम मेघौली’को गीत ’छड्के सलाम’को उत्कृष्ट कभर भिडियो बनाउनेका लागि निर्माण पक्षले आकर्षक योजना अगाडि सारेको छ । प्राप्त हुने उत्कृष्ट एक भिडियोलाई फिल्ममा समावेश गर्ने निर्माण पक्षले जनाएको छ । फिल्म असोज १७ गते, घटस्थापनाबाट प्रदर्शनमा आउँदैछ ।
’बेहुली फ्रम मेघौली’को गीत ’छड्के सलाम’को कुनै पनि साउन्ड प्रयोग गरी ल्यान्डस्केप साइजमा कभर भिडियो बनाउनु पर्नेछ । भिडियो एचडी क्वालिटीको हुनुपर्ने निर्माण पक्षले जनाएको छ । भिडियोलाई आफ्नो सामाजिक संजालमा पोस्ट गरेर उक्त भिडियो निर्माण पक्षको इमेलमा पठाउनु पर्नेछ । कभर भिडियो जुनसुकै उमेर समूहका व्यक्तिले बनाउन सक्नेछन् । लोकप्रिय हुँदै गएको यो गीतमा निश्चल बस्नेत र स्वस्तिमा खड्काको नृत्य छ । फिल्मका अन्य कलाकार पनि यो गीतको भिडियोमा देख्न सकिन्छ ।
ब्ल्याक हर्स पिक्चर्स र मेघौली फिल्मस्को ब्यानरमा निर्माण भएको सिनेमामा साजन काफ्ले र आकाश बरालको लेखन तथा निर्देशन रहेको छ । यो उनीहरुको डेव्यु निर्देशकिय सिनेमा हो । अभिनेत्री स्वस्तिमा खड्कालाई निर्माणमा निर्देशक तथा श्रीमान निश्चल बस्नेतले सघाएका छन् । फिल्मका कार्यकारी निर्माता फिरोज खड्का र शंकर पाण्डे हुन् ।
फिल्ममा निश्चल र स्वस्तिमा सँगै बसुन्धरा भुषाल, विजय बराल, सिमरन खड्का, लोकेन्द्र लेखक, रक्षा थापा, सिरु बिष्ट, आमिर गौतम, शिशिर सिवाकोटी, टीका पहारी, प्रभाकर शर्मा, लुनिभा तुलाधर, मुकुन्द मैनाली र रामबाबु रेग्मीको अभिनय रहेको छ ।
