मेलिना राईको ‘तिम्ले बाटो फेर्यौ अरे २’ सार्वजनिक
गायिका मेलिना राईको स्वरमा रहेको ‘तिम्ले बाटो फेर्यौ अरे’ हिट गीत मानिन्छ । मेलिनाको लोकप्रियता यसै गीतबाट निकै चुलिएको थियो । यस गीतलाई युट्युबमा एक करोड २३ लाख बढी पटक हेरिएको छ । हेर्नुहोस् भिडियो :
‘तिम्ले बाटो फेर्यौ अरे’को सफलतासँगै अहिले यस टीमले ‘तिम्ले बाटो फेर्यौ अरे २’ सार्वजनिक गरेको छ । यस गीतमा पनि मेलिना राईले स्वर दिएकी छिन् । दर्पण राईको शब्द समावेश यस गीतमा विक्रम राईको संगीत सुन्न सकिन्छ ।
‘तिम्ले बाटो फेर्यौ अरे’को दोस्रो भागलाई लिएर गायिका मेलिना निकै उत्साहित छिन् । भन्छन्, ‘मलाई यो स्थानमा पुग्न तिम्ले बाटो फेर्यौ अरे ले निकै सहयोग पुर्याएको छ। त्यसको दोस्रो भाग रिलिज भएको छ। यसले पनि मेरो करिअरमा थप सहयोग गर्नेमा म विश्वस्त छु।’ आफूले गाएको गीतहरूमा मन पर्ने गीत मध्ये यो पनि एक भएको मेलिनाको भनाई छ । मेलिनासँग गरिएको रमाइलो कुराकानी हेर्नुस :
त्यस्तै, गीतकार दर्पण राई पनि यस गीतलाई लिएर निकै आशावादी छन् । उनी भन्छन्, ‘पहिलो भागमा भन्दा दोस्रो भागमा धेरै मेहनत गरेका छौं । गीत मेकिङको हिसाबमा हामी कतै चुकेका छैनौं। त्यसैले यस गीतलाई लिएर निकै आशावादी छु।’ पहिलो भाग निकै सफल भएका कारण यो पनि सफल हुने उनको विश्वास छ ।
शान थापाको निर्देशनमा तयार भएको ‘तिम्ले बाटो फेर्यौ अरे २’को भिडियोमा मेलिना राई आफैँ फिचर छिन्। अनिल के मानन्धरले खिचेको भिडियोमा राजिव समरको कोरियोग्राफी तथा सुप्रिम पराजुलीको सम्पादन रहेको छ ।
