‘छक्का पञ्जा २’ मा टप्पा देउडा : प्रियंका, विल्सन र बुद्धिको ‘झ्याम्म झ्याम्म’ (फोटो फिचर)
बुधबारबाट मात्रै अमेरिकाबाट नेपाल फर्किएका नायिका प्रियंका कार्की बिहिबार दिनैभरी मुलपानीको हिलो चौरमा कम्मर मर्काउन व्यस्त रहिन् । हातमा झ्याम्टा बजाउँदै प्रियंकाले कम्मर मर्काउँदा स्थानियको भिड लागेको थियो । निर्देशक दिपाश्री निरौला आफैं भिड पन्छ्याउन व्यस्त थिइन् । निर्देशक निरौला भन्दै थिइन्, ‘यस्तै हो भने चार दिनमा पनि सकिंदैन् ।’
हुन् पनि हो तीन दिन छायाँकन तालिका छुट्याएको पहिलो दिन एक अन्तरा पनि पुरा हुन सकेन । उसो त बर्षातका कारण सुटिङ ढिला सुरु भएको थियो । हिलो र भीडका कारण अतिथि कलाकार विल्सन विक्रम राई डान्सको विट समात्न सकिरहेका थिएनन् । ‘सबै सँग ताल मिलाएर नाच्न त गाह्रो पो हुने रैनछ’,कोरियोग्राफर समेत रहेका विल्सनको मनोलक यस्तै यस्तै थियो । कोरियोग्राफर कविराज गहतराजलाई कलाकार बुद्धि तामाङलाई स्टेप बुझाउन हम्मे हम्मे परिरहेका थियो । निर्माता तथा लेखक समेत रहेका दिपकराजग गिरीले लामो समय पर्खिएर छोटो सट दिए । घाम डुब्यो । क्यामेरा अफ गर्दै एक दिनको सुटिङ प्याकअप गरियो ।
यो दृश्य असोज ११ गतेदेखि प्रर्शनमा आउने फिल्म ‘छक्का पञ्जा २’ को अर्को एक गीत छायाँकनको हो । किरण कंडेलको संगीत, उत्तम सञ्जेलको शब्द रहेको ‘झ्याम्म झ्याम्म’ बोलको गीतमा हरिवंश आचार्य र आस्था राउतको स्वर छ । यस गीतको कोरियोग्राफी कविराज गहतराजले गरिरहेका छन् । गीतको लागि मात्रै क्यामेरा पुरुषोत्तम प्रधानले क्यामेरा चलाई रहेका छन् । झण्डै ६० जना कोरस राखिएको गीतको भिडियोको छायाँकन करिब तीन दिनमा सक्ने निर्माण पक्षले योजना छ । भदौको दोश्रो सातामा भिडियो रिलिज गरिनेछ । पश्चिमेली लयको टप्पा देउडालाई दर्शक तथा श्रोताले मन पराउने निर्माण पक्षको विश्वास छ ।
गीत सुन्ने वित्तिकै दर्शकले मन पराउने प्रियंकाले आशा व्यक्त गरिन् । दिपक र दिपाले पनि ‘छक्का पञ्जा २’ मा दर्शकले खोजे जस्तो गीत बनेको बताए । फिल्मको पहिलो गीत नाइलनको साडीमाले चर्चा पाइरहेको छ ।