बले माथि धोका भो, तरपनि किन छन् उत्साहित ?

झण्डै ७ वर्षदेखि उक्त सानो पर्दामा बले क्यारेक्टर निर्वाह गर्दै आएका सागर लम्साल पछिल्लो समय म्युजिक भिडियोमा व्यस्त बनिरहेका छन् । म्युजिक भिडियोमा बलेको माग राम्रो छ ।

सागरले आफ्नो नयाँ गीत ’धोका भो’ मा अभिनय गरेका छन् । उक्त गीतको पोष्टरलाई प्रचार गरिरहेका छन् । यस गीतको लागि आफू निकै उत्साहित रहेको बले बताउँछन् । ’किन यति धेरै उत्साहित त ?’ ’यो गीत मेरो लागि विशेष छ । किनभने यस गीतमा मैले फरक काम गर्ने मौका पाएको छु, यस प्रश्नमा सागर भन्छन्, एउटा कमेडियनको रूपमा परिचय बनाएर भिडियोमा काम गर्दै गरेको मैले पहिलो पटक स्याड गीतमा काम गरेको छु । त्यसैले मेरो लागि यो गीत विशेष छ ।’

यो भिडियो दर्शकले रुचाएमा आफ्नो फरक परिचय बन्नेमा सागर विश्वस्त देखिन्छन् । ’मेरो लागि त यो गीत र भिडियो विल्कुलै फरक भइदियो’, सागर भन्छन्, ’यो भिडियो रुचाइयो भने मेरो करिअरमा अर्को इँट्टा थपिनेमा विश्वस्त छु ।’

यस गीतमा जातका कारण प्रेममा उत्पन्न भएको समस्यालाई समेटिएको छ । समाजको यथार्थसँग नजिक भएका कारण पनि आफूले यस भिडियोमा काम गरेको सागर बताउँछन् । ’प्रेम गर्दैमा प्रेमी वा प्रेमिका गलत हुँदैन । गलत त हाम्रो समाज छ । त्यसैले केही सचेतनालाई पनि भिडियोमा समेटिएको छ’, सागर भिडियोबारे प्रष्ट्याउँछन् ।

सन्तोष सुनारले शब्द, संगीत तथा स्वर रहेको यस गीतको भिडियोलाई मनोज बस्नेतले निर्देशन गरेका छन् । भिडियोमा सागरसँगै रेशनी कार्की र रश्मी भट्टको पनि अभिनय रहेको छ । भिडियो यही मंगलबार रिलिज हुँदैछ ।