वर्थडे विशेष : परिवारसँग रमाइरहेका चकलेटी हिरो आर्यन
नेपाली फिल्मका चकलेटी नायक तथा निर्माता आर्यन सिग्देलको आज जन्मदिन हो । सुर्खेतमा जन्मिएर थानकोटमा बसाईं सरेका आर्यन साउन २१ गते, ०७१ देखि ३९ (विकीपिडिया अनुसार) वर्षमा प्रवेश गरेका छन् ।
हरिष सिग्देललाई भुलेर आर्यन सिग्देलबाट आफ्नो फिल्मी करिअर सुरु गरेका आर्यनले छविराज ओझा र रेखा थापाको पहिलो फिल्म ‘किस्मत’बाटै चकलेटी हिरोको रुपमा चिनिए । ‘किस्मत’, ‘मेरो एउटा साथी छ’, ‘हिफाजत’, ‘कसले चोर्यो मेरो मन’ जस्ता फिल्मबाट आर्यन रजतपटमा स्थापित भए ।
एक समयका महंगा नायक आर्यन पछिल्ला वर्षहरुमा फिल्मी कम परिवारिक बढी भएका छन् । श्रीमती सपना भण्डारी र छोरासँग आर्यनको दिनचर्य बित्ने गर्दछ । फिल्म ‘महसुश’को प्रेसमिटमा आर्यन प्रेमिका सपना भण्डारीसँग पहिलो पटक सार्वजनिक भएको थिए । सपनासँगको बिहेपछि आर्यन परिवारसँग रमाउन थाले ।
आर्यन सिग्देलका पछिल्ला फिल्महरुले दर्शकका साथ पाइरहेका छैनन् । उनी अभिनित ‘च च हुईं’ अन्तिम पटक प्रदर्शनमा आयो, जुन फिल्म सफल भएन । आर्यन अभिनित डिसेम्वर फल्स प्रदर्शनको पर्खाइमा छ ।
‘किस्मत’, ‘मेरो एउटा साथी छ’, ‘हिफाजत’, ‘कोही मेरो’, ‘कसले चोर्यो मेरो मन’, ‘नोभेम्वर रेन’, ‘क्लासिक’ जस्ता आर्यनका फिल्मबाट आर्यनलाई दर्शकले रुचाए । नेपाली फिल्मका सफल अभिनेता आर्यन सिग्देललाई जन्मदिनको शुभकामना !
