रमित ढुंगानाको ‘नमेटिने घाउ’को औपचारिक घोषणा

अभिनेता रमित ढुंगानाले नयाँ फिल्म नमेटिने घाउ निर्माण तथा निर्देशनको घोषणा गरेका छन् । मंगलबार सामाजिक सञ्जालमा अफिसियल पोस्टर रिलिज गर्दै अभिनेता ढुंगानाले यो फिल्म बारे औपचारिक घोषणा गरेका हुन् ।

फिल्म नमेटिने घाउ सत्य घटनामा आधारित फिल्म हुने सार्वजनिक पोस्टरमा उल्लेख गरिएको छ । शिवम अधिकारीको लेखन रहेको फिल्ममा ओम सुनारको संगीत रहनेछ । फिल्मको निर्माण र निर्देशन चाहिं रमित ढुंगाना स्वयंले गर्दैछन् । माया नमार र बुद्ध वर्न इन नेपाल पश्चात् रमित फिल्म निर्माणमा फर्किएका हुन् भने उनको यो पहिलो निर्देशकिय फिल्म हो ।

‘चलचित्र ‘नमेटिने घाउ’ बाट मेरो निर्देशन को यात्रा सुरु गर्दैछु । गएको १० बर्षमा हाम्रो देशमा ३३ जना माथी एसिड आक्रमण भएको छ’, निर्माता तथा निर्देशक ढुंगानाले फिल्मको पोस्टर सेयर गर्दै आफ्नो फेसबुक वालमा लेखेका छन्, ‘एसिड आक्रमण गर्नु जगन्य अपराघ हो । यहि बिषयमा चलचित्र निर्माण गर्न लागेको छु । तपाईहरुको साथ र सहयोग मलाई जरुरी छ । Stop Acid Attack !’

फिल्ममा मुस्कान खातुनको मुख्य भूमिका रहनेछ । उनी एसिड आक्रमणमा परेकी हुन् । आक्रमणपछिको दृश्यमा उनको अभिनय रहने जनाइएको छ । एसिड आक्रमण हुनु अगाडीको भूमिका भने कलाकार रचना गौतमले निभाउने छिन् । उनले पनि यही फिल्मबाट डेब्यु गर्न लागेकी हुन् ।