‘डिग्री माइला’को छायांकन रुम्जाटार पुगेर सकियो
रामबाबु गुरुङको निर्देशनमा निर्माण भएको फिल्म ‘डिग्री माइला : एमए थर्ड क्लास’को छायांकन सकिएको छ । फिल्मको छायांकन ४५ दिनमा रुम्जाटारमा सकिएको हो ।
असोज १ गतेदेखि ओखलढुंगाको रुम्जाटारबाट पहिलो चरणको छायांकन सुरु गरिएको थियो । पहिलो चरणको छायांकन सकिएसँगै फिल्मको पोस्टर सार्वजनिक भएको थियो । दोस्रो चरणको छायांकन भने काठमाडौंबाट सुरु गर्दै ओखलढुंगाको रुम्जाटार पुगेर सकिएको हो । बाँसुरी फिल्मसको ब्यानरमा निर्माण भएको यो फिल्मले थर्ड डिभिजनमा मास्टर डिग्री पास गरेका एक शैक्षिक बेरोजगारको कथा पेस गर्छ । फिल्मले ‘डिग्री माइला’को माध्यमबाट बेरोजगारीसँगै नेपाली समाजको चित्र पस्किनेछ ।
फिल्ममा दयाहाङ सँगै आँचल शर्मा, विजय बराल, माओत्से गुरुङ, बुद्धि तामाङ, प्रकाश घिमिरेलगायतको अभिनय रहेको छ । फिल्मले ‘किन चाउरिस मरिच आफ्नै रागले’ भन्ने चर्चित नेपाली उखानलाई आफ्नो ट्यागलाइन बनाएको छ । फिल्म आगामी नेपाली नयाँ वर्षमा रिलिज हुनेछ । ‘डिग्री माइला’ वर्षकै प्रतिक्षित मध्येको एक फिल्म हो ।
