धिरज र उपासना मनाङमा ‘खुस्मा’ खेल्दै
हिमाली जिल्लामा मनाङमा फिल्म ’खुस्मा’को पहिलो सेड्यूलको छायाँकन सुरु भएको छ । गत हस्तादेखि फिल्मको पहिलो सेड्यूल सुरु भएको हो ।
हिउँका दृश्यहरु फिल्मको महत्वपूर्ण अंग भएकाले मनाङमा फिल्म छायाँकनका लागि पुगेको हो । मनाङमा आफ्नो १० दिने सुटिङ तालिका सकेर युनिट बाँकी छायाँकनका लागि पूर्वी रुकुम जानेछ । यो फिल्मबाट नायक धिरज मगर र नायिका उपसना सिंह ठकुरीले पहिलो पटक रिल जोडी बनेर पर्दामा आउँदैछन् । फिल्मलाई डेब्यू निर्देशक अशोक थापा मगरले निर्देशन गरिरहेका छन् । अशोक डकुमेन्ट्री फिल्मबाट अन्तर्राष्ट्रिय स्तरमा पुरस्कृत निर्देशक हुन् । यो फिल्मबाट उनले फिचर फिल्ममा डेब्यू गरेका हुन् ।
ॐएम मिडिया प्रा.लि.को प्रोडक्सनको ब्यानरमा निर्माण हुने सिनेमामा बेताने मगर, चन्द्र भट्टचन, मोहन राई र सुस्मिता बुढाथोकी निर्माता रहेका छन् । ‘खुस्मा’मा एस डी योगीले सुरेन्द्र राना तथा राम अविरल विष्टको गीतमा संगीत दिनेछन् भने दिपक बज्राचार्य छायाँकार रहनेछन् । फिल्ममा धिरज र उपसनाका सँगै अस्तित्व भट्टचन, खड्क बहादुर पुन (खबपु) तथा अरुण मगरको अभिनय रहनेछ ।
प्रेम कथामा आधारित ‘खुस्मा’ एम मिडिया प्रा.लि.को ब्यानरमा निर्माण हुनेछ । सिनेमालाई गोविन्द शाहीको काफिया फिल्मस्ले वितरण गर्नेछ ।