‘पुजार सार्की’को पहिलो झलकलाई प्रशंसा
अभिनेता त्रय आर्यन सिग्देल, प्रदीप खड्का र पल शाहले एकसाथ अभिनय गर्ने फिल्म ’पुजार सार्की’को झलक सार्वजनिक गरिएको छ । आइतबार सार्वजनिक गरिएको पोस्टरले प्रशंसा पाइरहेको छ ।
पुरानो ’टेक्स्चर’मा तयार पारिएको पोस्टरमा अभिनेता त्रय आर्यन, प्रदीप र पललाई राखिएको छ । यी अभिनेताहरू आ-आफ्नो चरित्रमा देखिएका छन् । पोस्टरको डिजाइनबाट चलचित्रको कथा अहिलेको नभई निकै वर्ष अघिको रहेको अनुमान लगाउन सकिन्छ । पोस्टर डिजाइन रोयल भिमसेनले गरेका हुन् । दिनेश राउतले निर्देशन गर्ने फिल्म पूजार सार्की जातीय विभेद विरूद्ध समाजका तिन पात्रहरूले गर्ने साझा संघर्ष को कथा हो । फिल्मको मङ्गलवारदेखि छायाङ्कन सुरु हुनेछ । फिल्म युटिन आइतबार कास्की जिल्लाको कास्कीकोट गाउँतर्फ हिँडेको छ ।
यस फिल्ममा अभिनेत्री द्वय अन्जना बराइली र परीक्षा लिम्बुले पनि प्रमुख भूमिकामा अभिनय गर्दैछन् । साथमा, मोहन निरौला, लोकेन्द्र लेखक, सुबास गजुरेल, विद्या कार्की, तारा शर्मा, शङ्कर आचार्य, प्रेम सुब्बा, गोविन्द रमण पराजुली लगायतको अभिनय रहनेछ ।
फिल्मको कथा विकास सुवेदीले लेखेका हुन् । यसअघि विकास र दिनेशले फिल्म ’प्रकाश’मा सहकार्य गरेका थिए ।
फिल्मलाई सङ्गीतकार सुबास भुसालले निर्माण गर्दैछन् । तीन स्टार आर्यन, प्रदीप र पल एकसाथ अभिनय गर्ने पुजार सार्कीको पोस्टर रिलिज भएसँगै थप हाइप निर्माण भएको छ ।
