फिल्म ‘हात्तीछाप’को प्रचारमा निःशुल्क स्वास्थ्य शिविर
फिल्म ‘हात्तीछाप’ माघको २६ गतेबाट रिलिज हुँदैछ । निर्माण युनिटले फिल्मको प्रचार प्रसार विभिन्न तरिकाले गर्दैछ । फिल्मको टिमले लायन्स क्लबसँगको सहकार्यमा किस्पाङ २ सातदोबाटोमा निःशुल्क स्वास्थ्य शिविरको आयोजना गरेको छ ।
गएको माघ १३ गते आयोजित शिविरमा नागरिकहरुलाई निःशुल्क उपचारका साथै औषधी वितरण समेत गरियो । जटिल रोगका बिरामीहरुलाई काठमाडौंको टिचिङ अस्पतालमा सहजीकरण गरिने निर्माता किरण नेपाली बताउँछन् । बृहत्त स्वास्थ्य शिविरमा सात सय बढी नागरिकहरुले निःशुल्क स्वास्थ्य परिक्षण गरेका थिए । यस्तै, उक्त शिविरमा १५ लाख भन्दा बढीको औषधी निःशुल्क वितरण गरिएको थियो । यो शिविरमा टिचिङ अस्पतालका ४९ जना डाक्टरहरुले नागरिकहरुको स्वास्थ्य परिक्षण गरेका थिए ।
‘हामीले फिल्मलाई व्यवसायिक कोणबाट मात्र हेर्नु हुँदैन । फिल्मलाई सामाजिक सेवामा पनि लगाउन सक्नुपर्छ । यसैले, हामीले यो स्वास्थ्य शिविरको आयोजना गरेका हौं,’ निर्माता नेपालीको भनाई ।
फिल्म ‘हात्तिछाप’मा सौगात मल्ल, दयाहाङ राई, उपासनासिंह ठकुरी लगायतको अभिनय छ । फिल्मको प्रोमो गत साता सार्वजनिक गरिएको छ ।
