‘हात्तीछाप’ले प्रिमियरमा कस्तो पायो प्रतिक्रिया ?
यो शुक्रबार, माघ २६ गतेबाट प्रदर्शनमा आउने फिल्म ‘हात्तीछाप’को मंगलबार प्रिमियर गरिएको छ । प्रिमियरमा फिल्मीकर्मी, सञ्चारकर्मी र फिल्मका कलाकारहरुको बाक्लो उपस्थिती थियो ।
निर्देशक ज्ञानेन्द्र देउजाले हात्तीछाप हेरेपछि प्रशंसा गरे । उनले, फिल्मले नेपालको एक ऐतिहासिक घटनालाई २ घन्टामा समेटेको देखेर आफूलाई आश्चर्य लागेको बताए । सिमोस सुनवार निर्देशित फिल्मको कथा लेखन प्रदीप भारद्धाजको छ । फिल्म हेर्न पुगेका निर्देशक शोभित बस्नेत, निर्देशक कृषा चौलागाई , नायिका रिस्ता बस्नेतले पनि यसको कथावस्तु, प्रस्तुति र कलाकारको अभिनयको प्रशंसा गरे ।
फिल्म हेर्नका लागि निर्देशक दिवाकर भट्टराई, मोडल गरिमा शर्मा, नायक तथा मोडल राज कटुवाल पनि हल पुगेका थिए । फिल्म हेरेपछि नायिका बेनिशा हमाल उत्साहित देखिइन् । फिल्ममा सरप्राइज भूमिकामा देखिएकी बेनिशाले दर्शकलाई यसको कथावस्तु मनपर्ने दाबी गरिन् । अर्की नायिका उपासना सिंह ठकुरीले पनि फिल्म राम्रो बनेकाले दर्शकले मन पराउने विश्वास व्यक्त गरिन् ।
फिल्म ‘हात्तीछाप’मा ‘बोत्तल राजा’को भूमिकामा देखिएका नायक सौगात मल्लले दर्शकले फिल्मलाई मन पराउने विश्वास व्यक्त गरे । फिल्मले विशेषगरि, दयाहाङ राई र सौगात मल्लको आ-आफ्नो कथालाई भनेको छ ।
किरण नेपालीको प्रस्तुतिमा तयार भएको यो फिल्ममा बिजय बराल, विल्सन विक्रम राई, पुष्कर गुरुङ, रेअर राई, सुष्मा निरौला, वुद्धि तामाङ लगायतका कलाकारको पनि अभिनय छ ।
फिल्मको अधिकांश हलमा बुकिङ समेत खुलिसकेको छ । फिल्मलाई अधिकांश हलले सुखद शोज उपलब्ध गराएका छन् । अभिनेता दयाहाङ राई भने अर्को फिल्मको छायाँकनमा व्यस्त भएका कारण प्रिमियरमा उपस्थित भएनन् ।