‘द रेड सुटकेस’ को मंगलबार विशेष शो

फिल्म ‘द रेड सुटकेस’ को मंगलबार विशेष शो आयोजना गरिएको छ । मंगलबार बेलुका काठमाडौंमा आयोजित शोमा फिल्मकर्मी तथा राजनीतिज्ञहरुको उपस्थिति थियो । फिल्म यही चैत ३० गतेबाट नेपालका सिमित हलहरुमा रिलिज हुँदैछ ।

प्रिमियर शोपछि अग्रज फिल्मकर्मी नीर शाहले आफुले स्थापना गरेको कलेज आफ फिल्म स्टडिजबाट फिल्ममा ग्राजुएसन गरेका फिडेल देवकोटा पहिलो देखि नै फरक प्रतिभाका व्यक्तित्व भएको बताए । ,‘आज यति सुन्दर नेपाली चलचित्र बनाएर अन्तराष्ट्रिय बजारमा फिडेलजीले द रेड सुटकेस मार्फत नेपाललाई चिनाउँदा मलाई गौरव लागेको छ । यस्ता चलचित्र नेपालमा अत्यन्त कम बन्ने भएकाले द रेड सुटकेस जस्ता चलचित्रलाई हामी सबैको साथ हुनुपर्छ ।’ सँधै व्यावसायिकता मात्र नहेरी विश्वले महत्व दिएको यस्ता फिल्मलाई प्रदर्शन गरेर सहयोग गर्न पनि उनले चलचित्र घरका सञ्चालकलाई अपिल गरे ।

कार्यक्रममा साँसद रघुजी पन्तले पनि आफुले अहिलेसम्म हेरेको नेपाली चलचित्र भन्दा द रेड सुटकेस पपृथक चलचित्र भएको बताए । यही पृथक भएर नै यसले अन्तराष्ट्रिय महोत्सबहरुमा विभिन्न अवार्ड जित्न सफल भएको पनि उनले बताए,‘यस्ता सिनेमा बन्नु आफैंमा मुख्यकुरा भए पनि हामीले हेरेर अर्को सिनेमा निर्माणको वातावरण बनाईदिनु पर्छ ।’ उनले भने ।

यस्तै पूर्व शिक्षामन्त्री अशोक कुमार राईले आफुले धेरैलामो समयपछि राम्रो चलचित्र हेर्ने अबसर पाएको बताए,‘द रेड सुटकेस मेरो सोच भन्दा फरक चलचित्र रहेछ ।’ उनले भने ।
लेखक बुद्धिसागरले यो चलचित्रमा आफ्नो गीत रहेको जानकारी गराउँदै फिल्मको स्कृप्ट पढेरै आफु यो चलचित्रप्रति आकर्षित भएको बताए,‘यस्तो अन्तराष्ट्रिय स्तरको चलचित्रमा गीतकारको रुपमा जोडिन पाउनुलाई मैले आफ्नो सौभाग्य मानेको छु ।’ उनले भने ।

यो चलचित्र हेरेपछि यसका अभिनेता विपिन कार्कीले सञ्चारकर्मीसँग भने,‘यस अघि भेनिस फिल्म फेस्टिबलमा यो चलचित्र हेरेको थिएँ तर आज नेपालका दर्शकमाझ हेर्दा उहाँहरुको प्रतिक्रियाले फरक अनुभव भयो ।’ आम चलचित्र भन्दा निकै फरक भएकै कारण यस्ता चलचित्रका निर्माताहरुलाई प्रोत्साहन गर्नुपछ भनेर आफुले द रेड सुटकेसमा विना पारिश्रमिक काम गरेको पनि उनले बताए,‘यो चलचित्र गर्ने समयमा मैले व्यबसायिक सिनेमा गर्दा राम्रो पारिश्रमिक पाउँथे । तर यस्तो चलचित्र जीवनमा कमै खेल्न पाईने भएकाले पनि मैले अरु चलचित्र छाडेर द रेड सुटकेशलाई महत्व दिएँ ।’ बिपिन अभिनित फिल्म महाजात्रा पनि हलहरुमा सफलताका साथ प्रदर्शन भैरहेको छ ।

अभिनेत्री मिरुना मगरले द रेड सुटकेस क्लासिक चलचित्र बनेको बताईन्, ‘मलाई यसमा रहनु भएका कलाकारहरुको काम देखेर साह्रो लोभ लाग्यो । टिमकै यसमा उच्च कोटीको काम रहेको छ ।’

यस्तै शिक्षाविद् केदारभक्त माथेमा, कवि विप्लव प्रतीकलगायतले पनि यो चलचित्रको प्रसँसा गरे । अभिनेत्री करिश्मा श्रेष्ठले यस्ता चलचित्रमा काम गर्ने तिब्र इच्छा आफ्नो पनि रहेको बताउँदै आफुले सेचेको भन्दै निकै माथिको चलचित्र द रेड सुटकेस बनेको छ भनिन् ।

निर्देशक फिडेल देवकोटाले विशेष शोमा अतिथिहरुको सुखद प्रतिक्रियाले आफुलाई निकै हौसला मिलेको छ भने,‘मैले आफ्नो सोचाईलाई चलचित्रमा उतारेको हुँ । यो चलचित्र हरेकलाई फरक फरक लाग्न सक्छ र हरेक प्रतिक्रिया स्विकार्य छ ।’