‘डिग्री माइला’को अग्रिम टिकट बुकिङ खल्यो, देशभर उच्च शो
नेपाली नयाँ वर्ष २०८१ को अवसर पारेर प्रदर्शनमा आउने फिल्म ‘डिग्री माइला’ अग्रिम टिकट बुकिङ खुला गरिएको छ । फिल्म देशभरका हलहरुमा सार्वधिक उच्च शो प्राप्त गरेको छ । शो संख्याका आधारमा फिल्मले बर्षकै सर्वाधिक ओपनिङ गर्न सक्ने अपेक्षा बढेको छ ।
फिल्मले देशको ठूलो हल चेन क्यूएफएक्स बाहेक देशभर ९७ शो पाएको छ भने क्यूएफएक्सले ५८ शो दिइसकेको छ । यसमा अझ शो संख्या थपिने अनुमान छ । अभिनेता दयाहाङ राईको शिर्ष भूमिका रहेको फिल्मले हालसम्म देशभर कुल एक सय ५५ शो पाइसकेको छ । भोलिसम्म यो संख्या अझ बढ्ने देखिन्छ । फिल्मका वितरक गोविन्द शाहीले फिल्मले शुक्रबार र शनिबार गरेर झण्डै पाँच करोड व्यापार गर्ने अनुमान गरेको बताए ।
शाहीका अनुसार फिल्मले शुक्रबार २ करोड ५० लाख माथि र शनिबार ३ करोड बढिको व्यापार गर्ने अनुमान गरिरहेको जानकारी दिए । यसअघि रामबाबु गुरुङ निर्देशित सिनेमा ‘कबड्डी-४’ले रिलिजको पहिलो शनिबार ३ कोरड बढिको व्यापार गरेको बताउँदै सिनेमाको हाइप अनुसार यो आँकडा अनुमान गरिएको बताए ।
ट्रेलर रिलिज भएयता दयाको डिग्री माइला चरित्रको स्वभावगत शैलीले दर्शकहरुलाई आफूतीर आकर्षित गरिरहेको छ । वर्षको सुरुवातमा ‘जारी’ले ल्याएको व्यापारिक उछाललाई ‘डिग्री माइला’ले पनि सुखद् अन्त्य दिने रुझान देखाएको छ । यही नाममाथि अभिनेता दयाको निर्देशनमा केही वर्ष अगाडि नाटकसमेत प्रदर्शन भइसकेको छ । सिनेमा सोही नामको नाटकमा आधारित रहेको छ ।
बाँसुरी फिल्मस्ले कबड्डी फिल्मस् तथा सुस्मा फिल्मस्सँग मिलेर निर्माण गरेको सिनेमाका निर्माताहरु विशाल गुरुङ, मणिराम पोखरेल, मधु मिजार तथा सुष्मा गुरुङ रहेका छन् । फिल्ममा दयासँगै अभिनेत्री आँचल शर्मा, कलाकारहरु माओत्से गुरुङ, प्रकाश घिमिरे, बिजय बराल, बुद्धि तामाङ, कमलमणी नेपाल लगायतको अभिनय छ ।