प्रकाश सपुतको ‘बसन्त’मा शान्ति बनिन् स्वस्तिमा

‘जात भन्दा माथि, शक्तिशाली, स्वतन्त्र र सुन्दर प्रेम कथा’ प्रस्तुत गर्ने सर्जक प्रकाश सपुतको पहिलो फिल्मको शिर्षक ‘बसन्त’ तय गरिएको छ । आइतबार प्रेसमिट गर्दै सर्जक सपुतले फिल्मको शिर्षक, कलाकार तथा प्राविधिक सार्वजनिक गरेका हुन् । फिल्मको प्रदर्शन मिती ०८१ सालको चैते दशैंलाई तय गरिएको छ ।

गीत संगीतको सफलता पश्चात् सर्जक प्रकाश सपुत फिल्ममा प्रवेश गरेका हुन् । फिल्ममा सपुतकै कथा र संगीत रहनेछ भने उनको अपोजिटमा अभिनेत्री स्वस्तिमा खड्का प्रस्तुत हुनेछिन् । फिल्ममा प्रकाशले शिर्ष भूमिका र स्वस्तिमाले शान्ति पात्र निभाउनेछिन् । उनीहरुले यस अगाडी सफल प्रोजेक्ट ‘कुरा बुझ्न पर्च’ र यस्को दोश्रो भागमा सहकार्य गरिसकेका छन् ।

गलबन्दी प्रोडक्सनको प्रस्तुतीमा बन्ने फिल्म बसन्तमा मोहन विश्वकर्मा, अनुरोध भट्टराई र नेन्सी शेरचन फिल्ममा कार्यकारी निर्माताको रुपमा छन् । फिल्ममा सुनिल विक मुख्य सहायक निर्देशकको रुपमा रहनेछन् । आइतबारको प्रेसमिटमा प्रकाश सपुतले बसन्त को अनावरण सँगै फिल्म घोषणाको अफिसियल भिडियो समेत हलमा देखाए, जुन भिडियो प्रेसमिट र युटुवमा रुचाइएको छ ।

चलचित्र विकास वोर्डका अध्यक्ष भुवन केसी, लोक दोहोरी गीत प्रतिष्ठानका अध्यक्ष रिता थापा मगरले फिल्म सफलताको शुभकामना दिए ।