‘प्रेम गीत २’ सँग निखिलको ‘रुद्र’ भिड्ने
निखिल उप्रेती प्रोडक्सनको ब्यानरमा बनेको फिल्म ‘रुद्र’ साउन १३ गतेदेखि प्रदर्शनमा आउने भएको छ । यसअघि साउन २० गतेलाई प्रदर्शन मिति तोकिएको ‘रुद्र’ को नयाँ प्रदर्शन मिति तोकिएको वितरक गोपाल कायस्थले जानकारी दिए । ‘हामी एक हप्ता अगाडी आएका छौं’, वितरक कायस्थले भने ।
यता अर्को फिल्म ‘प्रेम गीत २’ ले साउन १३ गते प्रदर्शन मिति तोक्दै प्रचार प्रसार समेत सुरु गरिसकेको छ । अब यी फिल्महरुबिच हलमा प्रतिस्पर्धा हुने पक्का भएको छ । रामजी लामिछाने निर्देशित फिल्म ‘रुद्र’ मा पहिलो पटक निखिल भिलेनको भूमिकामा प्रस्तुत भएका छन् । फिल्ममा निखिलसँगै नव कलाकार विश्व र सारालाई को पनि मुख्य भूमिका रहेको छ । साथमा रोयदिप श्रेष्ठ, जितेन लामा, भाष्कर ओली, ज्याक श्रेष्ठ, रोशन पोखरेल, अनिल पाण्डेको अभिनय छ । सौरभ लामाको सिनेम्याटोग्राफी रहेको ‘रुद्र’ मा हिमाल केसीको द्वन्द्व निर्देशन रहेको छ ।
