मलिकाको ‘सतीदेवी’ पोस्टर : “छोरी बुझौं, छोरी पुजौं”
लेखक तथा निर्देशक लक्ष्मण सुवेदी निर्देशित ’सतीदेवी’ को अफिसियल पोस्टर सार्वजनिक भएको छ । सार्वजनिक पोस्टरमा सतीदेवीको शीर्ष भुमिकामा रहेकी अभिनेत्री मलिका महतलाई अश्रु सहित नवजात शिशुलाई स्तनपान गराइरहेको देख्न सकिन्छ ।
यसैगरी पोस्टरमा मलिकासँगै दुई बालकलाकार हर्षिका वली र मन्जिला बाँनियालाई समेत फिचर गरिएको छ । उनीहरुलाई रोइरहेको देख्न सकिन्छ । यसअघिको पोस्टरमा मलिकालाई कालो मोसो र जुत्ताको माला लगाएर गाउँलेहरुले लखेटी रहेको अवस्थामा मलिकालाई प्रस्तुुत गरिएको थियो । सार्वजनिक भएको नयाँ पोस्टरले निर्देशक सुबेदीले फिल्मबाट छोरी हुनुको गम्भीर पीडालाई प्रस्तुत गर्ने बुझ्न सकिन्छ ।
यस्तै स्तनपान गराइएको दृश्यले मलिकाको भूमिकामा थप कौतुहलता उत्पन्न गराएको छ । यो कौतुहल्ताले दर्शकलाई आकर्षित गर्ने अनुमान गर्न सकिन्छ । सतिदेवी साउन ४ गते प्रदर्शन हुँदैछ । फिल्मले सौराह दक्षिण एशियाली फिल्म महोत्सवमा सर्वोत्कृष्ट फिल्म, शिव रेग्मी सर्वोत्कृष्ट निर्देशक तथा तेश्रो नेपाल ग्रामिण फिल्म फेष्टिभलमा सर्वोत्कृष्ट फिल्म, सर्वोत्कृष्ट स्क्रीप्ट र सर्वोत्कृष्ट अभिनेत्री जुरी मेन्सन अवार्ड जितिसकेकाले पनि फिल्मले दर्शकलाई रिझाउने प्रवल सम्भावना छ । फिल्मको कथा-पटकथा पनि सुवेदीले नै तयार पारेका हुन् ।|
दिलासा र साराको प्रस्तुतिमा तयार भएको फिल्म ‘सतीदेवी’ मा अभिनेत्री मलिका महत्तसँगै हर्षिका वली, मञ्जिला बानियाँ, सन्दीप बाबु लोहनी, रमेश बुढाथोकी, कुलदीप अधिकारी, भोला सापकोटा, सृजना अधिकारी, सुजिता सिवाकोटी, सन्देश लिम्बु, मनिषा सापकोटा, जयन्त रेग्मी, बिमल श्रेष्ठ, देव महर्जन, तुलसी श्रेष्ठ, इभेन जोशी, इश्वरी सिंह, पवन केसी र जगदिश अधिकारीको अभिनय छ ।
फिल्मको छायांकन बाबु श्रेष्ठले गरेका छन् भने तारा थापाको सम्पादन, दीपक शर्मा र सुवास थापाको संगीत, रामजी लामिछानेको कोरियोग्राफी, देव महर्जनको द्धन्द्ध निर्देशन छ । फिल्मको पोस्टर राकेश दाहालले डिजाइन गरेका हुन भने फोटो श्रीधर पौडेलले कैद गरेका हुन् ।
