जितु र नीतिको ‘ज्वाइँ साब’को छायांकन सुरु
फिल्म ‘ज्वाइँ साब’को मुर्हत गर्दै छायांकन सुरु गरिएको छ । शुक्रबार मकवानपुरको चित्लाङमा अवस्थित भैरव मन्दिरमा पुजा गर्दै छायांकन प्रारम्भ गरिएको हो । एक महिनासम्म यो फिल्मलाई विभिन्न फरक लोकेशनमा खिचिनेछ ।
निर्माण पक्षले दिएको जानकारी अनुसार, यो फिल्मलाई चित्लाङमा २० दिन खिचिनेछ भने सौराहा र इलाममा पनि फिल्म खिच्ने तयारी गरिएको छ । वसन्त निरौलाको निर्देशन गर्ने फिल्ममा कलाकार जितु नेपाल शिर्ष भूमिकामा प्रस्तुत हुँदैछन् भने नायिका नीति शाहको यो खजुरे ब्रो पश्चात् दोश्रो फिल्म हो ।
जीतु र नीति सँगै फिल्ममा वुद्धि तामाङ, हिमेश पन्त, रमेश वुढाथोकी, प्रकाश घिमिरे, निमा पाण्डे लगायतका कलाकारको मुख्य भूमिका रहनेछ । यो फिल्ममा श्याम तामाङको डीओपी, अर्जुन पोखरेल र महेश ताम्राकारको संगीत रहनेछ ।
रेड आइ फिल्मस्को प्रस्तुतिमा ओएसआर डिजिटल र मौसम फिल्मस्को सहकार्यमा यो फिल्म निर्माण हुन लागेको हो । फिल्मका प्रस्तुतकर्ता राज कुमार पण्डित हुन् । फिल्ममा मिनादेवी पाण्डे, सौगात पण्डित र पदमलाल तामाङको लगानी रहनेछ । विजय बस्याल कार्यकारी निर्माता रहेको फिल्ममा सविन अधिकारीको कथा, शंकर धितालको पटकथा तथा संवाद रहनेछ ।
फिल्म ‘ज्वाइँ साब’लाई समसामयिक कथामा निर्माण गर्न लागिएको निर्देशक निरौलाले जानकारी दिए । सामाजिक कथालाई कमेडी शैलीमा फिल्ममा भन्न लागिएको उनले जानकारी दिए । यो फिल्मलाई यो बर्षको तिहारमा रिलिज गर्ने तयारी समेत गरिएको छ ।
