पल शाह नेपालगन्जमा घेरिए, शनिबार रेकर्ड ब्रेक !
’पुजार सार्की’का अभिनेता पल शाहलाई नेपालगन्जमा दर्शकद्वारा भव्य स्वागत भएको छ । त्यहाँका सिनेरोयल र क्यूएफएक्स फिल्ममा उनी आउने जानकारी पाएका दर्शकले घण्टौँ अगाडीदेखि पर्खेर बसेका र पलको प्रवेश हल परिसरमा दर्शकको उत्साह थपिएको थियो ।
नेपालगन्जका हलहरूमा हाउसफुल दर्शकहरू रहेपछि पल दिनभर नेपालगन्जमा नै बसेका थिए । उनले आफूले सबै दर्शकलाई भेटेरै मात्र त्यहाँबाट फर्किने बताए । उनले सिनेरोयलमा रहेको राती ९.१५ बजेको अन्तिम शो का दर्शकलाई समेत भेट गरे । शनिबार सिनेरोयलमा प्राप्त आठ वटा शोमा मध्यान्हसम्मका सबै शो हाउसफुल भए । मध्यान्हपछिका शोहरूमा समेत फिल्मको सबै टिकेक बिक्री भएका थिए ।
पलसँगै निर्देशक दिनेश राउत पनि नेपालगन्ज पुगे थिए । सफलताका साथ दोश्रो सातामा चलिरहेको आफ्नो फिल्म हेर्न आएका सयौँ दर्शकमाझ पुग्दा पाएको सुखद प्रतिक्रियाबाट राउत निकै खुसी देखिए । हाउसफुल दर्शकमाझ उभिएका राउतले आफ्नो फिल्मको व्यावसायिक सफलता दिलाउने दर्शकलाई धन्यवाद व्यक्त गरे । दर्शकले फिल्म राम्रो रहेको प्रतिक्रिया पाइरहेको उनले बताए ।
सिनेरोयलमा आयोजित पत्रकार भेटघाटमा अभिनेता शाहले सकेसम्म नेपाल र विदेशमा रहेका सबै दर्शकमाझ पुग्ने आफ्नो चाहना रहेको बताए । “देश विदेशका दर्शकहरूबाट हामीलाई निम्तो आइरहेको छ । म भर्खरै जापान पनि पुगेर आएँ । अहिले हामी पश्चिम नेपालका दर्शक भेटिरहेका छौँ । बिस्तारै हामी अन्य स्थानहरूमा पनि पुग्नेछौँ,“ शाहले भने ।
गत बुधवार आदर्शनगरस्थित सिनेरोयल हलमा नेपाली फिल्मको रेकर्ड नै ब्रेक भएको हलका सिओओ रितेश श्रेष्ठले बताए । दश महिना अघि सञ्चालनमा आएको यो हल सञ्चालन भएदेखि गत बुधवार ’पुजार सार्की’ले प्राप्त गरेको छ वटा शो मा सबै टिकट बिक्री भई ऐतिहासिक रेकर्ड राखेको श्रेष्ठले बताए । “हिन्दी फिल्म बढी हेरिने क्षेत्रमा खुलेको यो हलमा नेपाली फिल्मको लागि यो भन्दा बढी खुसीको कुरा अरू के होला र ? ’पुजार सार्की’ले ऐतिहासिक रेकर्ड राखेको छ । नेपाली फिल्मको विकासले हामी हल सञ्चालकलाई खुसी दिलाएको छ,“ श्रेष्ठले बताए ।
फिल्म ‘पुजार सार्की’मा पलसँगै आर्यन सिग्देल, प्रदीप खड्का, अञ्जना बराइली र परिक्षा लिम्बुको मुख्य भूमिका छ ।
