नीता हरिहरको ‘ह्रस्व दीर्घ’ अब असोज ३ मा आउने
नीता ढुंगाना र हरिहर अधिकारी निर्मित तथा अभिनित फिल्म ‘ह्रस्व दीर्घ’ को रिलिज मिती घोषणा गरिएको छ । चन्द्र पन्त निर्देशित फिल्मलाई असोज ३ गते अर्थात् संविधान दिवसको अवसरबाट प्रदर्शनमा आउने भएको हो ।
सुरुमा यो फिल्मको प्रदर्शन मिती असोज ११ गतेलाई तय गरिएको थियो । नीताका अनुसार असोज ११ गते आउँदा दोस्रो हप्तादेखि दशैंका दुई ठूला फिल्महरु ‘छक्का पञ्जा ४’ र ‘बेहुली फ्रम मेघौली’ले असर गर्ने र असोज ३ मा आउँदा संविधान दिवस र असोज ९ गते जितिया पर्वको गरी दुईवटा विदा पाइने हुनाले फिल्मलाई एक साता अगाडी सारिएको हो ।
फिल्ममा नेपाली र दक्षिण भारतीय सिनेमाका चर्चित कलाकारहरुको सुची लामो नै छ । नेपालबाट नीता ढुंगाना, हरिहर अधिकारी, विपना थापा, गरिमा शर्मा, प्रशान्त ताम्राकार, सरोज खनाल, बुद्धि तामाङ, किरण केसी, रविन्द्र झा लगायतको अभिनय छ भने साउथबाट ब्रह्मानन्दम, अलि, प्रदीप रावत र कबीर दुहान सिंहको मुख्य भूमिका छ । हरिहर अधिकारीको कथा लेखन रहेको फिल्मलाई भारतीय छायांकार कवीरलालले खिचेका हुन् ।
फिल्मको नेपाल र भारतमा गरी तीन चरणमा छायांकन गरिएको छ । फिल्ममा मित्र डि. गुरुङको सम्पादन अनि रामजी लामिछाने र बलिउडका शुष्मा सुमनको कोरियोग्राफी रहेको छ ।
