‘होस्टेल ३’मा रिहान गिरी अनुबन्धित, अरु को-को थपिए ?
प्रि-प्रोडक्सनमा रहेको फिल्म ’होस्टेल ३’ को प्रमुख भूमिकामा रिहान गिरी अनुबन्धित भएका छन् । रिहान भ्वइस अफ सिजन चारका उत्कृष्ट दशसम्म पर्न सफल भएका थिए । त्यसपछि उनी चर्चामा आएका हुन् ।
रिहान यो फिल्मको प्रमुख पात्र मध्ये एक सशक्त भूमिकामा अनुबन्धित गरेको निर्देशक कँडेलले बताएका छन् ।रिहानलाई नै यो भूमिकामा लिनुको पछाडि विभिन्न कारणहरू रहेको जसमा प्रमुख कारण स्क्रिप्टले मागेको चरित्र रहेको उनले बताए । ‘रिहानलाई प्रमुख भूमिमाका लिनुको कारण बताउँदै निर्देशकले भने, ‘रिहान गिरी र पारस बम (कूल ब्वाय) जस्ता प्रतिभालाई अगाडी सारेका हौँ। त्यसमाथि पनि ‘होस्टेल’ चलचित्र शृङ्खलाको ’लिगेसी’ पनि स्थापित कलाकारबाट चलेको नभई ‘स्टार मेकर’को रूपमा आइरहेको छ । यसलाई ’मेन्टेन’ गर्नु पनि हाम्रो दायित्व रहन्छ। रिहानले नेपाल र नेपाली चलचित्रलाई अत्यन्तै प्रेम गर्ने रहेछन्। नेपाली चलचित्रमा उनको प्रवेश दुई देशको सम्बन्धको लागि पनि अत्यन्त महत्त्वपूणर् छ ।’
रिहानसँगै ’होस्टेल ३’मा पदम तामाङ र सिम्रन पन्तको पनि प्रवेश भएको छ । यसअघि यस फिल्ममा प्रमुख भूमिकामध्ये एकमा टिकटकर हुँदै इन्टरनेटमा ‘भिडियो कन्टेन्ट कृयटर’को रूपमा चर्चित ’कुल ब्वाय’ अर्थात् पारस बम अनुबन्धित भैसकेका छन् । यी चार कलाकारसँगै यो फिल्मको लाइनअप पुरा हुने क्रममा रहेको निर्देशक सशान कँडेलले बताए । कँडेलका अनुसार प्रमुख भूमिकामा अझै दुई कलाकारको जरुरत रहेको छ ।
’होस्टेल ३’को लागि माधव शर्माले स्क्रिप्ट लेखेका छन् । यसको कथा भने निर्देशक कँडेलले नै लेखेका हुन् । ‘होस्टेल ३’ लाई भने सम्मान इन्टरटेन्मेन्टले आरोन कन फिल्म्ससँगको सहकार्यमा बनाउँदै छ । यसका निर्माताहरू शिशिर ज्ञवाली, कार्यकारी निर्माता शङ्कर कोइराला, सह निर्माताहरू सुधा मरहट्ठा, सुरेश कँडेल र अर्जुन सापकोटा हुन् । लाइन प्रोड्युसर कणर् कार्की हुन् ।
