बोल्ड र बिन्दास भूमिकामा फिट साम्राज्ञी
अभिनेत्री साम्राज्ञी राज्यलक्ष्मी शाह अभिनित फिल्म ‘लण्डन टु पेरिस’ यो शुक्रबारबाट प्रदर्शन भैरहेको छ । फिल्ममा साम्राज्ञी मेघा पात्रमा प्रस्तुत छिन्, जो बाहिरबाट बिन्दास देखिन्छिन् तर मनमा भने पिडा बोकेकी छन् ।
‘निर्देशकले तपाईंजस्तै सिनेमाको क्यारेक्टर छ भनेर भन्नुभएको थियो । अहिलेको युवा पुस्ता जसरी धेरै रिलेसनमा बस्छ, इगो लिएर बस्छ, धेरै सोच्छ त्यस्तै क्यारेक्टर छ मेरो,’ साम्राज्ञी भन्छिन्, ‘अलि अलि मेरै जीवन कथासँग पनि मिल्छ होला । तर सबै होइन’, मेघा पात्रबारे साम्राज्ञीले भनेकी छन् । आफूलाई लभस्टोरी जानराबाटै अफर आउने र त्यसभित्रैबाट छानेर फिल्म गर्ने गरेको उनले बताइन् । तर आफूलाइ अरु जानराका फिल्ममा फरक फरक क्यारेक्टर पनि गर्ने रहर रहेको उनको भनाइ छ ।
‘मलाई त्यस्तै (लभस्टोरी) जानरामा राखिसकिएको छ । त्यस्तै खालका ८/९ वटा स्क्रिप्टबाट छनोट गरेर मैले काम गरिरहेको छु,’ ‘लन्डन टु पेरिस’ प्रचारका क्रममा उनले भनिन्, ‘पक्कै पनि म फरक-फरक जानरामा काम गर्न चाहन्छु । लभरगर्ल बाहेक अरु क्यारेक्टरमा पनि अनुभव लिन चाहन्छु । तर आइरहेका एकै खालका क्यारेक्टरबाट छनोट गरेर राम्रो स्कृप्टमा काम गरिरहेको छु ।’
तस्बिर : उद्धव रसाइली
घनश्याम लामिछाने निर्देशित फिल्म ‘लन्डन टु पेरिस’ मा साम्रज्ञी नव-नायक निश्चल खड्कासँग (अपिल) को अपोजिटमा प्रस्तुत भएकी छन् । पर्दामा मेघा र अपिलको भूमिकामा साम्राज्ञी निश्चल फिट देखिएका छन् ।
