‘बलिदान’ मा भित्रिए साउथका द्वन्द्व निर्देशक र छायाँकार
सन्तोष सेनको नयाँ फिल्म ’बलिदान’ को छायाङ्कनको लागि तयार भैरहेको छ । निर्माता सेनको मेगा प्रोजेक्टको रूपमा हेरिएको ’बलिदान’का लागि दक्षिण भारतका द्वन्द्व निर्देशक, छायाँकार तथा अन्य प्राविधिकको टोली निर्माण पक्षले महँगो पारिश्रमिकमा नेपाल भित्र्याइएको छ ।
जसमा, द्वन्द्व निर्देशक स्टन्डर साम र छायाकार शरण ऋषि सहित करिब ५० जनाको प्राविधिक टिमले ’बलिदान’मा काम गर्नेछन् । द्वन्द्व निर्देशक सामले राणा दगुबत्तीको चर्चित चलचित्र ’हात्ती मेरे साथी’, चियान विक्रमको चलचित्र ’थङ्गलम’ लगायतमा काम गरिसकेका छन् । छायाँकार ऋषि गत हप्ता रिलिज भएको नेपाली फिल्म ’बाटोः रोड टु डेथ’का छायाँकार हुन् । हाल नेपालमा उनको छायाङ्कनको खुलेरै तारिफ भइरहेको छ । त्यस्तै, उनले दक्षिण भारतमा चर्चित फिल्महरू सुपरस्टार रजीनिकान्तको फिल्म ’पेट्टा’ र सुपरस्टार चिरञ्जीवीको फिल्म ’आचार्य’को छायाङ्कन टिममा रहेर काम गरेका छन् ।
यसका साथै छायाङ्कनमा प्रयोग गरिने लाइट, साउन्ड, क्यामेरा लगायतका प्राविधिक सामग्रीहरू भारतको मुम्बईबाट ल्याउने निर्देशक सेनले बताए । उनले भने, “हामीले बलिदानलाई उच्चस्तरीय नेपाली फिल्म बनाउन कुनै पनि कसर बाँकी नराख्ने प्रण गरेका छौँ । यसको लागि हामीले दक्षिण भारतबाट प्राविधिक र मुम्बईबाट इक्विपमेन्टहरू ल्याएर काम गर्दैछौँ । यो एक सामान्य फिल्म मात्र नभएर नेपाली फिल्म उद्योगका लागि एक ऐतिहासिक, क्रान्तिकारी र महान् फिल्मको ढोका खोल्ने कोशेढुङ्गाका रूपमा साबित गराउनेछौँ ।’
‘बलिदान’को छायाङ्कनको लागि इटहरीमा रहेको बिएमसी छायाङ्कन स्टुडियोमा भव्य सेट तयार भइरहेको छ । साथै, विराटनगर क्षेत्रमा पनि सेट निर्माणको काम लगभग अन्तिम चरणमा रहेको सह निर्माता प्रेम पुरीले बताए । यसको करिब ६० प्रतिशत स्टुडियोमा नै छायाङ्कन हुँदैछ ।
’बलिदान’को प्रमुख भूमिकामा नेपाली फिल्मका एक्सन अभिनेता बिराज भट्टका छोरा समीर भट्टले अभिनय गर्दैछन् । एक ’प्याकेज हिरो’को सम्भावना बोकेका भट्टले लामो समयदेखि भारतको मुम्बईमा रहेर अभिनय, मार्सल आर्ट, नृत्य र द्वन्द्वमा तालिमहरू गरेका छन् । साथमा अभिनेता त्रय सौगात मल्ल, अर्पण थापा, दिव्य देव तथा अभिनेत्री ऋचा शर्माको पनि प्रमुख अभिनय रहनेछ ।
आसुसेन फिल्मस् प्रा.ली. तथा सन्तोष सेनको प्रस्तुति रहने यस फिल्ममा निर्माताको रूपमा पवन ब्राडफोर्ड बिस्ट तथा सह निर्माता प्रेम पुरी रहेका छन् ।
