‘के घर के डेराः घर नम्बर २’ मा निश्चल बस्नेतको प्रवेश

फिल्म ‘के घर के डेराः घर नम्बर २’ निर्देशक तथा कलाकार निश्चल बस्नेत अनुबन्धित भएका छन् । फिल्ममा मुख्य भूमिकामा अनुबन्धित भएको निर्देशक दीपेन्द्र के खनालले जानकारी दिए । यसअघि यो फिल्ममा नायक खगेन्द्र लामिछानेको प्रवेश भइसकेको छ ।

फिल्ममा अनुवन्धित भएपछि कलाकार बस्नेत उत्साहित देखिए । उनले, फिल्मको कथावस्तु बलियो रहेकाले आफू काम गर्न तयार भएको बताए । निश्चलको प्रवेशसँगै फिल्मको लाइनअप बलियो बन्ने निर्माण पक्षको विश्वास छ । फिल्मका लागि अन्य चार जना कलाकारहरुलाई मुख्य भूमिका अनुवन्धित गर्न बाँकी रहेको निर्माण पक्षले बताएको छ । ए प्लस इन्टरटेन्मेन्ट र नटराज क्रियशनको ब्यानरमा निर्माण हुन लागेको यो फिल्मको कथा चर्चित लेखक बुद्धिसागरले लेखेका हुन् । फिल्ममा शरद श्रेष्ठ, किरण महर्जन र राजिव श्रेष्ठ निर्माताको रुपमा छन् । युवराज कार्की फिल्मका कार्यकारी निर्माता हुन् ।

सामाजिक कथावस्तुमा निर्माण हुने यो फिल्मलाई यसै बर्ष रिलिज गर्ने योजनामा निर्माण पक्ष छ । फिल्मको छायाँकन साउनको २५ गतेबाट छायांकन गर्ने बताइन्छ ।