मन छुने मलिका महतको ‘सतीदेवी’ ट्रेलर
लक्ष्मण सुवेदीको लेखन, निर्माण र निर्देशन रहेको फिल्म ‘सतीदेवी’को मर्मस्पर्शी ट्रेलर सार्वजनिक भएको छ । भदौ ७ गतेबाट प्रदर्शनकमा आउने फिल्मको विहीबार प्रेसमिट गर्दैै प्रोमो सार्वजनिक गरिएको हो ।
महिला सशक्तीकरणको सन्देश दिने सामाजिक कथावस्तुको फिल्ममा अभिनेत्री मलिका महतको शिर्ष भूमिका छ । छोराको चाहनामा छोरीलाई तिलाञ्जली दिने पितृसत्तात्मक समाजलाई कटाक्ष गर्ने यो फिल्मलाई लक्ष्मण सुवेदीले निर्देशन गरेका हुन् । यसअघि विभिन्न अवार्डमा समेत उत्कृष्ट भएको यो फिल्मले छोरी हुनुको महत्व दर्शाउन खोजेको छ ।
फिल्ममा सन्दीपबाबु लोहनी, रमेश बुढाथोकी, कुलदीप अधिकारी, भोलाराज सापकोटा लगायतको अभिनय छ । मलिकासँगै बाल कलाकार हर्षिका वली र मन्जिला बानियाँ पनि फिल्ममा छन् । गोल्डेन स्टेट मुभी मेकर्स एलएलसी क्यालिफोर्नियाको सहकार्यमा दिलासा क्रिएसनको प्रस्तुति रहेको फिल्मको निर्माता श्रीदेवी सुवेदी हुन् ।
फिल्मको लेखन, गीत, निर्माण र निर्देशन लक्ष्मणकै छ । यो फिल्मले सौराह दक्षिण एसियाली फिल्म फेष्टिभलमा सर्वोत्कृष्ट फिल्म, शिव रेग्मी सर्वोत्कृष्ट निर्देशक तथा तेस्रो नेपाल ग्रामिण फिल्म फेष्टिभलमा सर्वोत्कृष्ट फिल्म, सर्वोत्कृष्ट स्क्रिप्ट र सर्वोत्कृष्ट अभिनेत्री जुरी मेन्सन अवार्ड जितेको छ ।
