‘घर नम्बर २’ मा केकी र उपासना अनुबन्धित
दिपेन्द्र के.खनालले निर्देशन गर्ने नयाँ फिल्म ‘के घर के डेराः घर नम्बर २’ का लागि मुख्य दुई अभिनेत्री अनुबन्धित भएका छन् । यो फिल्मका लाागि नायिकाद्धय केकी अधिकारी र उपासना सिंह ठकुरी यसै साता पक्का भएका हुन् ।
केकीले बैशाख महिनामा फिल्म ‘बोक्सीको घर’ ब्लकबस्टर भएपछि ‘के घर के डेराः घर नम्बर २’मा काम गर्न लागेकी हुन् । यस्तै, उपासनाले फिल्म ‘खुस्मा’को छायांकन सकेपछि यो फिल्ममा काम गर्न लागेकी हुन् । योसँगै फिल्ममा मुख्य कलाकारहरुको लाइनअप बलियो बनेको छ ।
वुद्धिसागरको लेखन रहेको फिल्ममा आर्यन सिग्देल, खगेन्द्र लामिछाने र निश्चल बस्नेत पक्का भैसकेका छन् । फिल्मको छायाँकन यही साउन महिनाको २५ गते अर्थात शुक्रबारदेखि सुरु गर्ने निर्माण पक्षको योजना छ । ए प्लस इन्टरटेन्मेन्ट र नटराज क्रियशनको ब्यानरमा निर्माण हुन लागेको यो फिल्ममा शरद श्रेष्ठ, किरण महर्जन, राजिव श्रेष्ठको लगानी रहनेछ । फिल्मका कार्यकारी निर्माता युवराज कार्की हुन् ।
फिल्मलाई सामाजिक कथावस्तुमा निर्माण गरिने निर्माण पक्षको भनाई छ । यो फिल्मलाई काठमाडौंमा रिच इन्टरटेन्मेन्ट र काठमाडौं बाहिर एफडी कम्पनीले वितरण गर्ने पक्का भएको छ । यो मल्टीस्टारर फिल्मलाई यही बर्ष नै रिलिज गर्ने बुझिन्छ ।
