‘अञ्जिला’ को प्रदर्शज मिति सर्यो
फिल्म ’अञ्जिला’को प्रदर्शज मिति सारिएको छ। सुरुमा माघ ११ गतेलाई रिलिज गर्ने योजना रहेको यो फिल्म अब फागुन २९ गते रिलिज हुने जानकारी गराइएको छ ।
निर्देशक मिलन चाम्सले सबै पक्षहरू मिलाउने क्रममा रिलिज मिति सार्नुपरेको बताएका छन् । फिल्म महिला राष्ट्रिय फुटबल टिमकी नम्बर एक गोलरक्षक एञ्जिला तुम्बापो सुब्बाको जीवनमा आधारित छ । एञ्जिला स्वयं मुख्य भूमिकामा प्रस्तुत भएकी छन् । साथमा अभिनेता दयाहाङ राई, सिर्जना सुब्बा, माओत्से गुरुङ, बुद्धि तामाङ लगायत कलाकारहरूको अभिनय छ । निर्माता प्रेम कुमार श्रेष्ठले पनि फिल्ममा प्रमुख भूमिका निर्वाह गरेका छन् ।
फिल्मको छायाङ्कन एञ्जिलाकै जन्मथलो इलामको आइतबारे, झापा, र काठमाडौँमा गरिएको छ । फिल्मको डिओपी सुदीप बराल र सम्पादन मिलन श्रेष्ठको रहेको छ भने मुन लभ इन्टरटेन्मेन्टको ब्यानरमा प्रेम श्रेष्ठले निर्माण गरेका हुन् ।
विनोद अग्रवाल र राजेश बगडिया सह-निर्माता हुन् । विनोद सुवेदी खत्री निर्माण नियन्त्रक हुन् ।
