‘ज्वाई साब’ पोस्टरमा जितु नीतिको बिहे, फूलपातीमा प्रदर्शन

फिल्म ‘ज्वाई साब’ पनि यो बर्षको दशैं, फूलपातीमै प्रदर्शन हुने भएको छ । निर्माण टिमले पोस्टरमा प्रदर्शन मिती असोजको २४ गते फूलपाति उल्लेख गरेको छ । एक गीत छायांकन हुन बाँकी रहेको घर ज्वाई साबको हाल पोष्ट प्रोडक्शनको काम भइरहेको छ ।

राजकुमार पण्डितको प्रस्तुतिमा तयार भएको यो फिल्मको शिर्ष भूमिकामा कलाकार जितु नेपाल छन् । उनलाई नायिका नीति शाहले साथ दिएकी छिन् । फिल्ममा वुद्दि तामाङ, शिशिर वाङ्देल, प्रकाश घिमिरे, रमेश वुढाथोकी, निमा पाण्डे, हिमेश पन्त, शिवहरि वैरागी, राजेन्द्र नेपाली, कविता आले, शिवु पाण्डे लगायतका कलाकारहरुको अभिनय छ ।फिल्मका प्रस्तुततकर्ता पण्डितले सबैसँग सल्लाहा गरेर फूलपातिमा फिल्म रिलिज गर्न लागिएको जानकारी दिएका छन् ।

विजय बस्याल कार्यकारी निर्माता रहेको फिल्ममा सविन अधिकारीको कथा, शंकर धितालको पटकथा तथा संवाद छ । रेड आई फिल्मस्को प्रस्तुतिमा ओएसआर डिजिटल र मौसम फिल्मस्को सहकार्य रहेको यो फिल्ममा मिनादेवी खड्का, सौगात पण्डित र पदमलाल तामाङको लगानी छ । फिल्ममा श्याम तामाङको डीओपी, अर्जुन पोखरेल र महेश ताम्राकारको संगीत छ ।

यो फिल्मलाई काठमाडौंमा रिच इन्टरटेन्मेन्ट र मोफसलमा एफडी कम्पनीले वितरण गर्नेछ । दशैंको लामो बिदाको फाइदा उठाउने योजनामा निर्माण पक्ष लागेको देखिन्छ । ‘फूलपाती’मा दिपक दिपाको छक्का पञ्जा ५ सहित अन्य निर्माताले पनि सोही मितीमा फिल्म रिलिज गर्ने लक्ष्य लिएको बुझिन्छ ।