बेनिशा हमालको व्यस्तता, ‘मोहर’मा भइन् अनुबन्धित
निर्देशक ओमप्रतीक गुरुङको नयाँ फिल्म ‘मोहर’ मा अभिनेत्री बेनिशा हमाल अनुबन्धित भएकी छन् । गत शुक्रबार निर्माण पक्ष र बेनिशाबिच सम्झौता भएको हो ।
फिल्मको शीर्ष भूमिकामा बेनिशालाई लिखित अनुबन्धित गरिएको निर्माता चुम्बनजंग शाहीले जानकारी दिएका छन् । यसअघि यो फिल्ममा पल शाह, अर्जुनजंग शाही र नीति शाह फाइनल भइसकेका छन् ।
‘अहिलेसम्म चार जना कलाकार फाइनल गरेका छौं,’ निर्माता शाहीले भनेका छन्, ‘कलाकार छनोटका कामहरु, वर्कसप र गीतको काम भइरहेको छ ।’ उनका अनुसार फिल्मको छायांकन माघ ४ देखि सुदूरपश्चिममा हुनेछ ।
‘मोहर’अघि बेनिशा फिल्म ‘एक्लो’को छायांकनमा व्यस्त हुनेछिन् । यसैवर्ष ‘कल्ली’ पनि उनको लाइनअपमा छ । बेनिशाको पछिल्लो सुपरहिट फिल्म ‘छक्कापञ्जा ४’ हो भने उपहार प्रदर्शनमा आएको थियो ।
यस वर्ष बेनिशाले आफ्नो हिन्दी डेब्यु फिल्म ‘दुर्गम’को छायांकनमा समेत समय दिनेछिन् । यसका लागि उनी भारत जानेछिन् । यो हिन्दी फिल्ममा धडक, द लास्ट शो, फराज जस्ता चर्चित भारतीय फिल्मका अभिनेता गोदान कुमार पनि देखिनेछन् ।
