कृषाले गराइन् कन्फ्युजन, सौगात र प्रदीपमा को हुन् ‘पिताम्बर’ ?
मल्टीस्टारर फिल्म ’पिताम्बर’ को भदौको पहिलो साताबाट दोस्रो चरणको छायांकन सुरु हुँदैछ । फिल्मको यतिबेला वर्कसप चलिरहेको छ । छायाँकन जानु पुर्व निर्देशक कृषा चौंलागाईंले फिल्मको शिर्ष भूमिकालाई लिएर कन्फ्युजन सृजना गरिदिएकी छन् ।
निर्देशक चौंलागाईंले अभिनेताद्वया सौगात मल्ल र प्रदीप खड्कासँगको तस्बिरमा ’पिताम्बर’ को हो ? भन्दै प्रश्न दर्शकमाझ दोधार सृजना गरेकी हुन् । उनले सौगात र प्रदीप दुई मध्ये पिताम्बर को हो ? भन्ने प्रश्न गरेकी हुन् । दुवै उत्तिकै सबल र स्टारडम भएकाले ’पिताम्बर’को मुख्य पात्र ’पिताम्बर’को हो भन्नेमा कौतुहलता छ । यो कौतुहलतालाई जोगाउने प्रयास निर्माण टिमले गरिरहेको छ ।
हालसम्म फिल्मको मुख्य पात्र सौगात वा प्रदीपमा को हो ? भन्ने निर्माण टिमले लुकाएको छ । यसलाई निरन्तरता दिने निर्देशक चौलागाईंले चलाखी गरिरहेकी छन् ।
फिल्ममा सौगात र प्रदीपसँगै आँचल शर्मा, अनुपविक्रम शाही, सुरक्षा पन्त, प्रमोद अग्रहरी, दिव्यदेव, सुपुष्पा भट्ट, कामेश्वर चौरासिया, गौरव विष्ट, विशाल पहारी लगायतको कलाकारको अभिनय रहनेछ । कलाकारको यो लाइनअपले सिनेमा केही फरक र स्पेसल रहेको संकेत गरेको छ ।
’पिताम्बर’को पहिलो चरणको छायांकन नवलपरासीको त्रिवेणी धाममा मुहूर्त गरेर भएको थियो । फिलमको पहिलो सेड्युलमा अभिनेत्री सुरक्षा पन्त, अभिनेता अनुप विक्रम शाही, प्रमोद अग्रहरि, कामेश्वर चौरासिया, दिव्य देव, सुपुष्पा भट्ट, विशाल पहारी, गौरव बिष्ट र बालकलाकारको भागको छायांकन भएको थियो ।
केपी फिल्मस्ले पुरुषोत्तम प्रधान फिल्मस्सँग सहकार्य गरेको पिताम्बरलाई पुरुषोत्तम प्रधानले खिचिरहेका छन् । फिल्मको निर्मातामा विशाल चौलागाईं छन् ।
प्रदीप भारद्धाजको लेखन रहेको फिल्मको बजेट ५ करोड अनुमान गरिएको छ । यसअघि उनले ‘ऐंचो पैंचो’ निर्देशन गरेकी थिइन् ।
