‘सानो संसार’ घटस्थापनाबाट सर्यो, स्वस्तिमाको फिल्म सोलो
फिल्म ‘सानो संसार’को प्रदर्शन मिति हेरफेर गरिएको छ । यसअघि असोज १७ गते घटस्थापनामा रिलिज हुने तयारीमा रहेको सिनेमा अब एक हप्ता अगाडी असोज ११ गते प्रदर्शनमा आउने निर्माता अर्जुन कुमारले जानकारी दिएका छन् ।
निर्माता कुमारले सामाजिक सञ्जाल फेसबुकमा एक पोस्टर सेयर गर्दै लेखेका छन्, हाम्रो सिनेमा ‘सानो संसार’ अब एक हप्ता अगाडी असोज ११ गते अर्थात् सेप्टेम्बर २७ बाट रिलिज हुने जानकारी गराउँदछु । अगामी दिनमा यहाँहरु सवैको सहयोगको अपेक्षा गर्दछौं ।’ सानो संसार घटस्थापनाबाट सरेपछि स्वस्तिमा खड्का स्टारर फिल्म बेहुली फ्रम मेघौली सो मितीमा सोलो रिलिज हुने भएको छ ।
पारिवारिक कथावस्तुमा निर्माण भएको फिल्म सानो संसार मा हाँस्य कलाकार सीतादेवी तिमल्सेनाको मुख्य भुमिका रहेको छ । उनी केदार घिमिरे ‘माग्नेबुढा’की श्रीमती हुन् । फिल्ममा सीता सँगै राज पंगेनी शर्मा, अनु दाहाल, अन्जसा रिजाल शिशिर सिवाकोटीको अभिनय रहने छ । यी सवै कलाकारले नेपाली रजतपटमा डेव्यु गर्दैछन् ।
राजधानी मिडिया एड प्रोडक्सन र प्रिन्सेस मूभिजको व्यानरमा सिनेमा निर्माण भएको छ । सिनेमाका कार्यकारी निर्माता माधव वाग्ले रहेका छन् । अर्जुनकुमारको राजधानी मिडिया र प्रिन्सेस मूभिजले यो सिनेमालाई संयुक्तरुपमा प्रदर्शन गर्नेछन् ।
सिद्धार्थ पुडार्सनीले फिल्मलाई निर्देशन गरेका हुन् । यही फिल्मबाट उनले लेखन तथा निर्देशनमा डेव्यु गर्दैछन् । उनलाई फिल्मको कथा लेखनमा सरिष्मा पुँडासैनीले सघाएकी छन् ।
