‘होस्टेल ३’ को वार्डेन आर्यन, परीक्षा लिम्बुको पनि प्रवेश
फिल्म ’होस्टेल ३’ मा अभिनेता आर्यन सिग्देल अनुबन्धित भएका छन् । निर्माण पक्ष र सिग्देलबीच बुधवार सम्झौता भएको हो । फिल्मको छायाँकन यसै साताबाट सुरु हुँदैछ ।
आर्यन सिग्देल यो फिल्ममा ’वार्डेन’को भूमिकामा देखिनेछन् । “उहाँले निभाउने ’वार्डेन’को भूमिका चलचित्रको मेरुदण्ड हो । यस अघिपनि ’होस्टेल’ शृङ्खलामा वार्डेनको भूमिका चर्चित थियो, तर यस पटकको भूमिका अझै बलियो छ,“ निर्देशक कँडेलको भनाई छ । अभिनेता सिग्देलसँगै अभिनेत्री परीक्षा लिम्बु पनि फिल्ममा अनुबन्धित भएकी छन् । निर्देशक कँडेलले उनको विशेष भूमिकामा अभिनय रहने जानकारी दिएका छन् । यसअघि, आर्यन र परीक्षाले फिल्म ’पुजार सार्की’मा सँगै काम गरेका थिए ।
’होस्टेल ३’ आगामी फागुन १६ गते विश्वभर एकसाथ रिलिज हुने तयारीमा छ । बुधवार नै जापान, मध्यपूर्व र मलेसियाका लागि चलचित्रको वितरण अधिकार बिक्री भइसकेको छ । फिल्ममा आर्यन र परीक्षासँगै ’कुल ब्वाय’ अर्थात् पारस बम, रिहान गिरी, आशिष घिमिरे, पदम तामाङ, सिम्रन पन्त, हेना नगरकोटी, उमर खान, समा पराजुली, सन्तोष बानियाँ लगायतका कलाकारहरूले अभिनय गर्दैछन् ।
