आइतबारबाट ‘सानो संसार’को प्रदर्शन स्थगित
गत बिहिबारबाट प्रदर्शनमा आएको फिल्म ‘सानो संसार’ प्रदर्शन स्थगित भएको छ । फिल्मको निर्माताले आइतबारदेखि प्रदर्शन स्थगित गर्ने निणर्य शनिबार गरेका हुन् । बाढीपहिरो र प्राकृतिक विपत्तिले मानिसलाई आवतजावत गर्न समेत कठिन भएकाले यस्तो निणर्य गरिएको निर्माताद्वारा जारी विज्ञप्तिमा उल्लेख छ ।
निर्माता अर्जुन कुमार र माधव वाग्लेले विज्ञप्ति मार्फत जनधनको सुरक्षालाई पहिलो प्राथमिकतामा राख्दै केही समयको लागि प्रदर्शन रोक्ने निणर्य गरिएको उल्लेख गरेका छन् । सहज वातावरण भएपछि फिल्मको पुनः प्रदर्शन गरिने जनाइएको छ । ‘सम्भवतः कात्तिक वा मंसिरका लागि नयाँ प्रदर्शन मिति घोषणा गर्नेछौं’ निर्माता कुमारले भने, ‘प्रदर्शन सार्ने निणर्यबाट दर्शकलाई परेको असुविधाप्रति क्षमाप्राथि छौं ।’
निर्माताको निणर्य लगत्तै क्यूएफएक्स, आइएनआई लगायतका ठूला मल्टिप्लेक्स चेनले आइतबारको लागि शोज क्यान्सिल गरेका छन् । झरीका कारण हलमा फिल्म हेर्ने दर्शकको संख्या न्युन छ ।
