रिलिज अगावै स्वस्तिमाको फिल्मले बनायो यस्तो रेकर्ड
रिलिज अगावै स्वस्तिमा खड्का स्टारर फिल्म ‘बेहुली फ्रम मेघौली’ले नयाँ रेकर्ड बनाउन सफल भएको छ । हालसम्म सर्वाधिक शो संख्या पाउने यो फिल्म पहिलो रहेको वितरक अशोक शर्माले जानकारी दिएका छन् ।
‘बेहुली फ्रम मेघौली’ ले काठमाडौंभित्र र बाहिरका मल्टिप्लेक्स र सिंगल थिएटर गरी ३३५ शो पाएको वितरक शर्माले जानकारी दिएका छन् । अहिलेसम्म ठूला ब्यानर र पपुलर ब्रान्डका सिनेमा रिलिज हुँदा पनि यति धेरै शो नपाएको उनको भनाइ छ । स्वस्तिमा खड्का र निश्चल बस्नेतको मुख्य भूमिका रहेको चलचित्रमा लगानी उनीहरुकै छ । सजन काफ्ले र आकाश बरालको फिल्ममा लेखन तथा निर्देशन रहेको छ । फिल्म यो बिहिबार, फूलपातीबाट प्रदर्शन हुँदैछ ।
निश्चल र स्वस्तिमासँगै सिनेमामा बसुन्धरा भुषाल, विजय बराल, सिमरन खड्का, लोकेन्द्र लेखक, रक्षा थापा, सिरु बिष्ट, आमिर गौतम, टीका पहारीलगायतको पनि अभिनय रहेको छ । सिनेमाले उमेर पुगेकी युवतीमाथि समाज र परिवारले विवाहका लागि दिने दबाब र सोका कारण उत्पन्न परिस्थितिको कथा पेस गर्छ ।
ब्ल्याक हर्स पिक्चर्स र मेघौली फिल्मस्को ब्यानरमा निर्माण भएको सिनेमामा अभिनेता विजय बराल कास्टिङ डिरेक्टर रहेको सिनेमामा नरेन्द्र मैनालीको छायांकन, प्रदीप लामा र केवीका खत्रीको कोरियोग्रफी छ ।
जयन जे वाइवा र कुशल पोखरेलको संगीत, निमेष श्रेष्ठको सम्पादन, घनश्याम श्रेष्ठको प्रोडक्सन डिजाइन छ । सिनेमालाई एप्पल इन्टरटेनमेन्ट र डिसिएनले वितरण गर्दैछन् ।
