ट्रेन्डिङमा ‘ह्रस्व दिर्घ’को प्रोमो : १ दिनमै ११ लाख बढी भ्युज

नीता ढुंगाना निर्मित पहिलो फिल्म ‘ह्रस्व दिर्घ’को ट्रेलरलाई एक दिनमा एघार लाख बढी दर्शकले युटुवमा हेरेका छन् । नेपाली र बलिउडका स्टार कलाकारहरु अभिनित यो फिल्मको प्रोमो यतिबेला युटुव मुभिज अन्र्तर्गत दोश्रो नम्बर ट्रेन्डिङमा छ । प्रोमो :

प्रोमो हेरेपछि दर्शकले ‘ह्रस्व दिर्घ’को पर्खाइमा रहेको प्रतिक्रिया दिएका छन् । प्रोमोमा बाइस हजार बढी लाइक र झण्डै पच्चीस सय दर्शकको सकारात्मक प्रतिक्रिया छ । चन्द्र पन्तको डेव्यु निर्देशकिय फिल्ममा हरिहर अधिकारी र नीता ढुंगानाको मुख्य भूमिका छ । प्रोमोले एक दिनमा पाएको सर्वाधिक भ्युज, प्रतिक्रिया र ट्रेन्डिङलाई लिएर निर्देशक पन्तले आफ्नो अभिव्यक्ति रमाइलो छ डटकमलाई दिएका छन् ।

‘प्रोमोले पहिलो दिनमा पाएको हाइपबाट हामी फिल्मप्रति थप आशावादी भएका छौं । नेपालका हल सञ्चालकले उत्साहित हुँदै फोन गर्नु भैरहेको छ । प्रोमो हेरेपछि इन्डियाबाट समेत सम्पर्क भैरहेको छ’, निर्देशक पन्त प्रोमोको भ्युज बारे भन्छन्, ‘प्रोमोले पाएको यो भ्युज हाम्रै हो । मिडियाकर्मीदेखि धेरै फिल्मकर्मीले राम्रो मानेर सेयर गरिरहनु भएको छ । दर्शकले प्रोमो हेरेर दिनु भएको सुझावलाई पनि हामी फिल्ममा सुधार्ने प्रयास गर्नेछौं । दर्शकलाई के विश्वास दिलाउन चाहान्छौं भने ‘ह्रस्व दिर्घ’ फिल्म प्रोमो भन्दा दश गुणा राम्रो छ !’

काल्पनिक प्रेम कथामा निर्मित फिल्म ‘ह्रस्व दिर्घ’मा बलिउडका कलाकार प्रदीप रावत, ब्रम्हानन्दम् र नेपाली कलाकार बिपना थापा, रेखा थापा, सरोज खनाल, गरिमा शर्मा लगायत थुप्रै कलाकारहरुको अभिनय छ । फिल्म यही कात्तिक ३० गतेदेखि प्रदर्शनमा आउँदैछ ।