चेला बिजयको सफलतामा दंग बने गुरु दयाहाङ

चेला बिजय बरालको सफलतामा गुरु दयाहाङ राई दंग भएका छन् । बिहिबार विशेष शोमा ’पूर्ण बहादुरको सारंगी’ हेरेपछि उनले मिडियामा चेलाले पाएका सफलतामा आफ्नो खुसी साटेका हुन् ।

’मैले विजयलाई चिनेको १७ वर्ष भयो । त्योबेला देखि उसले अभिनय बाहेक अरू गरेको थिएन् । लगातार सिनेमा गरेको चाहीं १३ वर्ष भयो होला,’ दयाहाङले भने, ’यो उसको लगनशीलता हो । आफ्नो कामप्रतिको इमान्दारिता हो। यो सफलता त्यसको मूल्य हो। त्यसमा मलाई एकदमै गर्व र खुसी लागिरहेको छ। यो एकदिन हुनुथियो। अझै बढी हुने अपेक्षा गरेको छु ।’ दयाहाङले विजयको अभिनयको खुलेर तारिफ गरे । दया र बिजयले ‘कबड्डी’, ‘जारी’ जस्ता सफल फिल्महरुमा एकसाथ अभिनय गरेका छन् ।

बक्स अफिसमा छाइरहेको ‘पूर्ण बहादुरको सारङ्गी’का पूर्णेको बयान गर्दै दया भन्छन्, ’मैंले उसको अभिनय हेरेको १७ वर्ष भयो । हरेक पटक उसले मलाई ट्वा पार्ने हो। नाटकमा मेरो निर्देशकमा उसले काम गरेको छ । मेरो कोएक्टरको रूपमा काम गरेको छ। हरेक अनसेट उसले ट्वा पार्ने हो । आम मानिसहरूले लिड क्यारेक्टरलाई अगाडि हेर्छन् । तर, उसले पछाडि कति आनन्दले काम गरिरहेको हुन्छ। पूणर्बहादुरको सारंगीमा उसले मुख्य चरित्र पायो। चरित्रलाई मजाले ह्याण्डिल गरेर लगेको छ ।’

फिल्ममा विजय सहित प्रकाश सपुत, अञ्जना बराईली, मुकुन भुसाल, बुद्धि तामाङ, देशभक्त खनाल, अलिशा बास्कोटा, भोलाराज सापकोटा लगायतको अभिनय छ। विनोद पौडेल र प्याट्रिक सुवेदी निर्माता हुन् । फिल्म बिहीबारदेखि प्रदर्शनको तेस्रो सातामा प्रवेश गरेको छ ।

सरोज पौडेल निर्देशित फिल्मले घरेलु बक्स अफिसमा तीन करोड नजिकको व्यापार गरेको छ । गन्धर्व समुदायको कथामा आधारित फिल्ममा छोराको भविष्यका लागि बाबुले गरेको संघर्षलाई मर्मस्पर्शी रूपमा देखाइएको छ ।