सकियो ‘द म्यान फ्रम काठमाण्डू’ को नेपाल छायांकन
फिल्म ‘द म्यान फ्रम काठमाण्डू’ को नेपाल छायांकन समाप्त भएको छ । बाँकी छायांकन हलिउड नगरी लस एन्जल्समा हुुने गत विहिबार आयोजित पत्रकार सम्मेलनमा जानकारी दिइयो । नेपाल इन्ड कल्यापको अवसरमा निर्माता संस्था ट्रीसिटी पिक्चर्सले मिडियासामु फिल्मबारे अवगत गरायो ।
क्यूएफएक्स सिनेमाज् प्रमुख समेत रहेका निर्माता नकिम उद्दिनले बाँकी विश्वलाई नेपाली कथा सुनाउन यो फिल्म प्रभावकारी हुने धारणा राखे । पाँच करोड बजेट बताइएको फिल्ममा संलग्न विदेशी प्राविधिकबाट स्थानिय प्राविधिकले सीप सिकेको र मुलुकको प्रचारप्रसार समेत हुने धारणा उद्दिनको थियो । ‘कागबेनी’ र ‘सानो संसार’ले थालेको डिजिटल यात्रा द म्यान फ्रम काठमाण्डूसम्म आइपुग्दा नेपाली फिल्मले ऐतिहासिक फड्को मारेको उनले बताए ।
भारतीय, पाकिस्तानी र हलिउड कम्पनीले समेत नेपालको पहिलो अंग्रेजी फिल्मको वितरणमा चासो व्यक्त गरेको उनले जनाए । ‘भारतमा गुल्सन ग्रोवर र पाकिस्तानमा हमिद शेखमार्फत त्यहाँका कम्पनीले चासो देखाएका छन्’ उनले भने, ‘हलिउडमै सुटिङ र पोस्टप्रोडक्सन हुने भएकाले त्यहाँका कम्पनीले समेत रुचि देखाएका छन् ।’
निर्देशक पेमा धोन्डुपले उद्दिनले निर्माण गरेको कागबेनी हेरेपछि टीमअप गर्ने रुचि पलाएको बताए । तिब्बती शरणार्थी अभिभावकको रुपमा जोमसोममा हुर्किएका पेमाले त्यहाँ छँदै आफूमा कथाको विकास भएको अनुभव सुनाए ।
