हात्ती चढेर फिल्म प्रचारमा पल र पूजा
असार ३० गतेदेखि प्रदर्शनमा आउने फिल्म ‘म यस्तो गी गाउँछु’ टिमले शुक्रबार चितवनमा हात्ती र्याली निकालेको छ । अभिनेता सरोज खनाल, नायक पल शाह र नायिका पूजा शर्मालाई १ वटा हात्तीमा राखेर शुक्रबार चितवन शहर परिक्रम गराइएको हो ।
पहिलो पटक हात्ती चढेका नायक पल शाहले हात्ती चढ्दा रमाइलो लागेको बताए । ‘रमाइलो हुँदो रहेछ, अझ फिल्म प्रचार गर्दा बेग्लै अनुभव भयो’, पलले भने । यता थुप्रै पटक हात्ती चढेकी नायिका पूजा शर्माले हात्ती माथि चढेर गरिएको फिल्मको प्रचार बारे प्रष्ट्याउँदै भनिन्, ‘हामी हात्ती जसरी लम्किरहेका छौं । यो प्रचारको नयाँ शैली पनि हो ।’ हात्ती माथि चढेका सरोज, पल र पूजालाई हेर्न सर्वसाधरणको घुइँचो लागेको थियो ।
चितवनको हात्ती परिक्रमा पछि पल, पूजा र टिम बुटवलतर्फ लागेको छ । बुटवलपछि पोखरा हुँदै उनीहरु आइतबार काठमाण्डौं फर्किनेछन् । सुदर्शन थापा निर्देशित फिल्म म यस्तो गीत गाउँछु को गीत संगीतले चर्चा पाइरहेको छ । सुदर्शन र पूजा मिलेर बनाएको फिल्म प्रतिक्षामा छ ।
