प्रियंका र निकको विवाहमा बलिउड स्टारलाई निम्तो छैन
बलिउड अभिनेत्री प्रियंका चोपडा र अमेरिकी गायक निक जोनसको विवाहको चर्चा धेरै समय अगाडि देखि चलिरहेको छ । उनीहरुको विवाह डिसेम्बर एक र दुई तारिखमा जोधपुरस्थित उमेद भवन प्यालेसमा हुने भनिएपनि विवाहमा बलिउडका स्टारहरलाई निम्तो गरिएको छैन ।
पिंकभिल्लाको एक रिपोर्ट अनुसार प्रियंका र निकको विवाह निकै नजिकका साथी र आफन्तका बीचमै हुनेछ भने विवाहमा केहि पनि स्टार नहुने बताइएको छ । उनीहरुको विवाहमा बलिउडका कसैलाई पनि निमन्त्रण नगरिएपनि विवाहपछि आफ्ना साथी र बलिउड स्टारहरुलाई पार्टी दिने अनुमान लगाइएको छ ।
प्रियंकाको परिवारसँगै निकको परिवार पनि विवाहको लागि निकै उत्साहित देखिएका छन् । अझ यो विवाह लागि प्रियंकाको बैनी अभिनेत्री परिणिती चोपडा झन् उत्साहित रहेकी छन् । यसको साथै उनी भिनाजुको जुत्ता चोर्ने पर्खाइमा छिन् ।
परिणितीले उनीहरुको इन्गेजमेन्ट देखिनै जुत्ता चोर्ने योजना बनाई सकेको मिडियामा बताएकी छिन् । उनले सामाजिक सञ्जाल मार्फत जुत्ता चोरेपछि ५ मिलियन डलर माग्ने उल्लेख गरेकी छिन् ।
