सलमानको सल्लाहमा रोहितले ‘सुर्यवंशी’ सारे
एजेन्सी– बलिउड अभिनेता सलमान खानले निर्देशक रोहित शेट्टीप्रति भाईचार देखाउदै ‘सुर्यवंशी’को रिलिज डेट सार्वजनिक गरेका छन् । सुर्यवंशीमा अक्षय कुमार, अजय देवगन, रणवीर सिंह र कैटरिना कैफको मुख्य भुमिका रहेको छ ।
बक्स अफिसमा सलमान र अक्षयको फिल्म बक्स अफिसमा टक्कर हुने अनुमान लगाइएको थियो । सलमानले रोहित शेट्टीसँग छलफल गरेर फिल्मको रिलिज डेटमा बदलेका हुन् । सलमानले रोहितसँगको फोटो सार्वजनिक गर्दै फिल्मको रिलिज डेट सार्वजनिक गरेका छन् । उनले लेखेका छन्, ‘मैंले रोहितलाई सधैँ सानो भाई जस्तै मानेको छु । आज सावित भएको छ । रोहित शेट्टीको सुर्यवंशी २०२० मार्च २७ मा रिलिज हुँदैछ ।’
निर्देशक शेट्टीले यो फिल्म अर्काे वर्ष इदमा रिलिज गर्ने योजना बनाएका थिए । सलमान खानले २००९ देखि इदमा आफ्नो फिल्म रिलिज गर्दै आएका छन् । यो वर्ष इदको अवसरमा ‘भारत’ प्रर्दशन गरेका छन् । यो फिल्मको सफलतासँगै उनले अर्काे वर्ष इदमा सञ्जय लीला भन्सालीले निर्देशन गर्ने फिल्म ‘इन्शाहअल्लाह’ रिलिज गर्ने घोषणा गरेका छन् । यो फिल्ममा सलमान खान र आलियाको मुख्य भुमिका रहेको छ ।
अब इन्शाअल्लाह र सुर्यवंशी दुवै फिल्म सोलो रिलिज हुने सम्भावना रहेको छ । यो दुवै फिल्मको लागि फाइदाको कुरा हो । सलमान र अक्षयको फिल्म हेर्नको लागि दर्शक बाँडिनु नपर्ने भएको छ ।
