‘जिरोपछि अहिले फिल्म खेल्ने मन छैन’: शाहरुख खान
एजेन्सी– बलिउड अभिनेता शाहरुख खानले धेरै सुपरहिट फिल्म दिएका छन् । तर उनको पछिल्लो फिल्म ‘जिरो’ बक्स अफिसमा फ्लप भयो । यो फिल्मपछि उनले कुनै फिल्म साइन गरेका छैनन् । उनले अन्तरिक्ष यात्री राकेश शर्माको बायोपिक ‘सारे जहाँ से अच्छा’बाट हात झिकेका थिए ।
जिरो फ्लप भएपछि शाहरुख फिल्मबाट डराएको भन्ने चर्चा चलिरहेको छ । हालै उनले फिल्म साइन नगर्नुको कारण खुलाएका छन् । उनले भने, ‘मैले अहिले कुनै फिल्म साइन गरेको छैन । म प्राय एउटा फिल्म सकिने बित्तिकै अर्काे फिल्ममा काम सुरु गरिहाल्छु । तर जिरोमा काम गरेपछि अहिले फिल्म खेल्ने मन छैन । मैले थोरै समय लिन आवश्यक छ जस्तो लाग्छ । केहि समय फिल्महरु हेर्छु, कहानी सुन्छु र धेरै भन्दा धेरै किताब पढ्छु ।’
उनले थप्दै भने, ‘मेरो छोरी कलेज गइरहेकी छिन् । छोराको पढाई सकिन लाग्यो । म अहिले परिवारसँग धेरै भन्दा धेरै समय बिताउन चाहन्छु ।’ शाहरुख खान ‘धुम ४’ मा हुने भन्ने खबर बाहिरिएको थियो तर यो फिल्म फाइनल भएको छैन ।
