‘रातो घर’ हेरेपछि केपी ओलीले भने, ‘रमाइलो छ’

पुर्व प्रधानमन्त्री तथा एमाले अध्यक्ष केपी शर्मा ओलीले प्रदर्शनरत फिल्म ‘रातो घर’ हेरेका छन् । बिहिबार कमलपोखरीस्थित बिग मुभिजमा सुरज सुब्बा नाल्बो निर्देशित फिल्म ‘रातो घर’ हेरेपछि पुर्व प्रधानमन्त्री ओलीले फिल्म ‘रमाइलो’ रहेको प्रतिक्रिया दिए ।

सञ्चारकर्मीसँगको कुराकानीमा उनले भने, ‘यसमा दुईटा कुरा देखिन्छ । नराम्रो काममा लाग्यो भने त्यसको परिणामा नराम्रो हुन्छ भने नराम्रो काममा लागेका युवाको भावना पनि निकै राम्रो हुन्छ भन्ने देखाएको छ । रातो घर रमाइलो छ ।’ फिल्ममा ‘झकमले’ को भूमिकामा प्रस्तुत भएका कलाकार विल्सन विक्रम राई, ‘दुक्की’ को भूमिकामा प्रस्तुत भएका संयम पुरी र ‘झापाली’ अनुरागमानसिंह कुँवरको अभिनय राम्रो लागेको उनले बताए । प्रतिक्रिया दिने क्रममा दुक्की खोइ ? भनेर समेत ओलीले सोधेका थिए ।

ओली सहित ‘रातो घर’ हेर्न पुर्व सभामुख सुवास नेम्वाङ, एमाले नेता प्रदीप ज्ञावली लगायत नेताहरु बिग मुभिज पुगेका थिए । यस्तै निर्माता छविराज ओझा, निर्देशक दिपाश्री निरौला, कलाकारहरु जितु नेपाल, केदार घिमिरे ‘माग्ने बुढा’, गायक रामकृष्ण ढकाल, नायिका आश्मा डिसी लगायत उपस्थित थिए ।

निर्देशक सुब्बा र विल्सनको संयुक्त लगानीमा निर्माण भएको फिल्ममा विल्सन, संयम र अनुराग सहित गौरव पहारी, मेनुका प्रधान, भानु प्रताप लगायत कलाकारहरुको अभिनय रहेको छ । फिल्मले व्यापार सुखद गरिरहेको विल्सनले जानकारी दिए ।