‘चिसो एस्ट्रे’बाट सविन राईको कमव्याक (गीत)
फिल्म ‘चिसो एस्ट्रे’ले दोस्रो गीत सार्वजनिक गरेको छ । फिल्मले शिवरात्रीलाई लक्ष्य गरी सोमबारको दिन गीत सार्वजनिक गरेको हो । फिल्म चैत ११ गतेदेखि प्रदर्शनमा आउँदैछ ।
सार्वजनिक गीतमा गायक सविन राईको स्वर छ । पछिल्लो समय सांगीतिक दुनियाँबाट पर रहेका सविनले यही गीतबाट कमब्याक गरेका हुन् । उनले स्वर सुहाउँदो कम्पोजिसन र गीतको शब्दपनि रोचक रहेकाले गीत गाउन रमाइलो भएको प्रतिक्रिया दिएका छन् । गीतमा संगीत अजर जंगमको रहेको छ भने शब्द रचना दिनेश पाल्पालीले गरेका हुन् ।
दिनेश पाल्पालीको निर्देशन रहेको फिल्मको यसअघि ‘ड्रिम पाइरेसी’ बोलको गीत सार्वजनिक भइसकेको छ । अजर जंगमको स्वर तथा संगीत रहेको सो गीतको फरक खालको भिडियो रुचाइएको थियो ।
कंगारु क्रिएसन र लोकल सिनेमाको संयुक्त ब्यानरमा निर्मित फिल्मलाई महेशबाबु तिमल्सिनाले प्रस्तुत गरेका हुन् । निर्माणमा भने महेशबाबुलाई प्रबिन स्याङ्बा र सुष्मिता पराजुलीले सघाएका छन् । फिल्मको सह निर्मातामा भने रुपेश ढुंगाना, नविन ढुंगाना र सुजन खतिवडा रहेका छन् ।
फिल्ममा दिव्यदेव, नवीन लम्साल, निकुन श्रेष्ठ, सुशीलराज पाण्डे, रवीन तामाङ र सृष्टि श्रेष्ठ लगायत अन्य कलाकारको अभिनय रहेको छ ।
