रेखाको तीज गीतमा नीताले भाँचिन् ’छमछम पातली कम्मर’
हरितालिका तीजको अवसरमा गायिका रेखा शाहले तीज गीत ’छमछम पातली कम्मर’ सार्वजनिक गरेकी छिन् । टेकेन्द्र नेपाली शब्द र संगीत रहेको गीतमा पुष्कर खत्रीको सङ्गीत संयोजन छ । गीतको म्युजिक भिडियोमा नायिका नीता ढुंगाना र गायिका शाहले अभिनय आकर्षक नृत्य गरेका छन् । भिडियो :
यस वर्षको तीज गीतबारे गायिका शाह भन्छिन्, “लोकगीतले मनोरन्जनमात्रै नदिई हाम्रो संस्कृति र सङ्गीतलाई जीवन्त राख्दै पुस्तान्तरण गर्ने भएकोले यसपालि मैले तीज गीत रेकर्ड गरेकी हुँ ।“ रेखा शाह फाउन्डेसनको व्यानरमा निर्माण भएको गीतको म्युजिक भिडियोलाई स्मृति तिमिल्सिनाले निर्देशन र कोरियोग्राफी गरेकी छिन् । रुपेश थापाको छायांकन, मिलन विश्वकर्माको सम्पादन रहेको गीतमा नायिका नीता ढुंगानाले तीजमा देखिने नारीहरूको मनोभावलाई दुरुस्त उतार्दै बेजोड नृत्य गरेकी छिन् । नीता भन्छिन्, “बिहेपछिको मेरो पहिलो तीज हो । यो गीत मेरै लागि बनेको हो कि झैं लाग्छ तर यस गीतले यसपालिको तीजमा केही विशेष मनोरन्जन भने पक्का दिनेछ !“
’सिमसिमे पानीमा’ जस्तो कालजयी लोकगीतकी सर्जक गायिका रेखा शाहका यसअघि पनि तीज गीतहरू सार्वजनिक भएका छन् । गायिका शाहले यो गीत आफ्नै युट्युव च्यानल ’रेखा शाह’बाट सार्वजनिक गरेकी हुन् ।
