यशराज स्टुडियोमा रेकर्ड गरिएको ‘सिमसिमे पानीमा’ सार्वजनिक

रेखा शाहले ’सिमसिमे पानीमा’को नयाँ भर्सन ल्याएकी छन् । मुम्बईस्थित यशराज स्टुडियोमा रेकर्ड गरिएको नयाँ अडियोमा रिकेश गुरुङ ’कि’को सङ्गीत संयोजन र उत्पादन रहेको छ भने भारतीय वाधवादकहरूको वादन रहेको छ । भिडियो :

भारतीय फिल्मका चर्चित गीतहरूको रेकर्डिङ र ध्वनि मुद्रण गर्ने विजय दयालले सिमसिमे पानीलाई नयाँ स्वरूपमा उतारेका हुन् । गीतबारे गायिका शाह भन्छिन्, “आधुनिक प्रविधि र सुविधा सम्पन्न रेकर्डिङ स्टुडियोमा गीत रेकर्ड गर्ने सपना थियो, त्यो सपना मेरो जीवनको परिचायक गीतबाट पूरा गर्न पाएँ । यसले मलाई थप हौसला प्रदान गरेको छ ।“

‘सिमसिमे पानीमा’को लयलाई सहनाईले ध्वनिमा उतारेको गीतले स्रोतालाई नयाँ स्वाद दिनेमा गायिका शाह विश्वस्त छिन् । सो गीतका दुईवटा म्युजिक भिडियो पनि एकैसाथ सार्वजनिक गरिएको छ । गीतलाई कथानकसँग बुनेर बनाइएको भिडियोमा गायिका शाहले अभिनेता महेश त्रिपाठीसँग अभिनय गरेकी छिन् । रुपेश थापाको छायाङ्कन र निर्देशन रहेको सो गीतमा मिलन विश्वकर्माको सम्पादन रहेको छ । नेपाली कलाकारिता क्षेत्रको एउटा कथालाई सो भिडियोमा प्रस्तुत गरिएको छ ।

२०४९ सालमा गायिका रेखा शाहले आफ्नै रचना, सङ्गीत र स्वरमा रेडियो नेपालले आयोजना गरेको अधिराज्यव्यापी लोकगीत प्रतियोगितामा प्रथम स्थान हाँसिल गरेपछि यो गीत लोकप्रिय गीत बन्न सफल भयो । सो गीत रेकर्ड भएको ३ दशकको अवसर पारेर गायिका शाहले नयाँ अडियो र भिडियो सार्वजनिक गरेकी हुन् ।