‘प्रेम गीत २’ को क्लाइमेक्स तस्बिर लिक, निर्माता नै बने ‘भिलेन’
एक सातापछि प्रोमो रिलिज गर्ने तयारीमा रहेको ‘प्रेम गीत २’ को क्लाइमेक्सका तस्बिरहरु लिक भएको निर्माता सन्तोष सेनले बताएका छन् । क्राउडका एक सदस्यले क्लाइमेक्स फाइटका तस्बिरहरु रिलिज गरिदिएको निर्माता सेनको दाबी छ ।
क्लाइमेक्सका तस्बिरहरु लिक भएपछि आफ्नो योजनाहरु असफल भएको निर्माता सेनको भनाई छ । उनले आफ्नो चरित्रलाई पनि गोप्य राख्न चाहेको बताएका छन् । फिल्ममा उनी भिलेनको भूमिकामा छन् भने नायक प्रदीप खड्का प्याक सहित प्रस्तुत छन् । तस्बिरहरु लिक गरेका चन्द्र भूजेललाई कार्यालयमा बोलाएर केरकार गर्ने र आगमी दिनमा सर्तकता अपनाइने निर्माता सेनको भनाई छ ।
निर्माता सेनले क्लाइमेक्सका तस्बिरहरु लिक भएको दाबी गरेता पनि निर्माण पक्षले योजनावद्ध रुपमै तस्बिरहरु सार्वजनिक गरेको फिल्मी बजारमा चर्चा छ । बलिउड तथा हलिउडमा पनि प्रदर्शन पुर्व चर्चाका फिल्मको तस्बिर तथा भिडियो लिक गर्ने प्रचलन छ । रामशरण पाठकको निर्देशन रहेको फिल्म ‘प्रेम गीत २’ असार १३ गतेदेखि प्रदर्शनमा आउँदैछ । फिल्ममा प्रदीप र नव नायिका अश्लेष ठकुरी मुख्य भूमिकामा छन् ।
