चलचित्र संघले अमेरिकामा नेम्पा फिल्म अवार्ड गर्ने
तीन संस्करणसम्म आयोजना भएको मोसन पिक्चर अवार्ड नेपाल चलचित्र संघले पुनः आयोजना गर्ने भएको छ । एक दशक अगाडी भएको मोसन पिक्चर अवार्ड नयाँ नामाकरण ‘नेम्पा फिल्म अवार्ड’ यही सेम्टेम्वर २ तारिखमा डिएबिएस इन्टरटेनमेन्ट डलास अमेरिकासँगको सहकार्यमा अमेरिकाको डलासमा आयोजना हुने संघका अध्यक्ष प्रदीप कुमार उदयले जानकारी दिए ।
उत्कृष्ट फिल्म सहित नृत्य निर्देशकसम्म गरी विभिन्न १८ विधामा वितरण गरिने नेम्पा फिल्म अवार्डमा ४४ वटा फिल्महरुले सहभागीता जनाउँदैछन् । चलचित्र संघले सार्वजनिक गरेको सूचनाको तपसिलको आधारमा संघमा दर्ता हुन आएका फिल्महरु मात्रै अवार्डमा सहभागी गराइएको अध्यक्ष उदयले जानकारी दिए । उनले भने, ‘यो पपुलर अवार्ड होइन । हामीले समिक्षात्मक रुपमा अवार्ड गर्न लागेका हौं ।’ सहभागी फिल्महरुलाई तीन सदस्यीय जुरीले यही असार ११ गतेदेखि मूल्याँकन गर्न सुरु गर्नेछन् । उत्कृष्ट तीन मनोनयन भने सम्भवतः साउनको पहिलो साता सार्वजनिक गरिनेछ ।
