‘शत्रुगते’ को ५ करोड बढी कलेक्सन, काटियो केक
फिल्म ‘शत्रुगते’ को पहिलो साताको व्यापार सार्वजनिक गर्दै सफलताको खुसीयाली सेलिव्रेट गरेको छ । यो शुक्रबारदेखि दोश्रो सातामा प्रदर्शन हुने फिल्मले ६ दिनमा पाँच करोड ६२ लाखको ग्रस व्यापार गरेको रिपोर्ट वितरकले सार्वजनिक गरेका छन् ।
मल्टीस्टारर फिल्म ‘शत्रुगते’ ले ६ दिनमा राजधानीबाट ३ करोड २५ लाखको ग्रस व्यापार गरेको वितरकद्वाय गोपालकाजी कायस्थ र सुमन गिरी भान्जाले जानकारी दिए । यस्तै मोफसलबाट २ करोड ३७ लाखको व्यापार गरेको रिपोर्ट छ । ६ दिनमा ५ करोड ६२ लाखको व्यापार गरेको फिल्मले पहिलो साताबाटै फिल्मको लगानी सुरक्षित गर्न सफल भएको छ ।
बिहिबार बिग मुभिजमा वितरकले उपलब्ध गराएको केक काट्न अभिनेता हरिवंश आचार्य, निर्देशक प्रदीप भटटराई, निर्माता आँचल शर्मा, निर्माता किरण केसी, वितरक कायस्थ, गिरी भान्जा लगायत उपस्थित थिए ।
पारिवारिक कथामा बनेको कमेडी फिल्म ‘शत्रुगते’ मा अभिनेता आचार्य, दिपकराज गिरी, दिपाश्री निरौला, प्रियंका कार्की, पल शाह, आँचल शर्मा, रमेश रञ्जन झा, शिवहरी पौडेल, बसुन्धरा भूषाल लगायत कलाकारहरुको अभिनय रहेको छ ।